Karl Wernersson Mynd: Tryggvi Aðalbjörnsson
Athugið þessi frétt er meira en 4 ára gömul.
Seldi syninum Lyf og heilsu á eina milljón
Skiptastjóri þrotabús Karls Wernerssonar hefur höfðað fimm riftunarmál til að reyna að endurheimta eignir sem voru fluttar af hans nafni fyrir gjaldþrotið, meðal annars Lyf og heilsu sem sonur hans keypti á eina milljón. Heildarkröfur í búið nema um tólf milljörðum.
Athafnamaðurinn Karl Wernersson, sem var einn af aðaleigendum eignarhaldsfélagsins Milestone fyrir hrun, var úrskurðaður gjaldþrota í vor. Síðan hefur skiptastjóri búsins haft ýmsar ráðstafanir Karls á eignum sínum til rannsóknar og í Fréttablaðinu er greint frá því að það hafi nú leitt til þess að skiptastjórinn hafi höfðað nokkur mál til að rifta ýmsum þessara ráðstafana.
Samkvæmt upplýsingum fréttastofu voru málin höfðuð í vikunni og eru fimm. Það fyrsta varðar sölu á félaginu Toska ehf. til Jóns Hilmars, sonar Karls, á eina milljón króna. Ein af eignum Toska, í gegnum tvö dótturfélög, er apótekakeðjan Lyf og heilsa.
Mynd: Sigurður Þórisson - RÚV
Fréttastofa sagði frá því í fyrra að Karl hafi, degi eftir að hann var dæmdur í fangelsi í fyrravor, skilað inn breyttum ársreikningi félagsins Lyfja og heilsu þar sem hann var ekki lengur tilgreindur eigandi, heldur sonur hans. Óljóst var hvenær sú eigendabreyting átti að hafa orðið. Inni í einum af dótturfélögum Toska eru líka 30 fasteignir og fleira.
Annað riftunarmálið snýst um tilfærslu Karls á tveimur eignum inn í félag sem heitir Faxi ehf., dótturfélag Toska. Þangað færði hann annars vegar hrossaræktarbúgarðinn Feta í Rangárþingi Ytra, og hins vegar félagið Vátt, sem keypti Galtalækjarskóg árið 2007 á 225 milljónir. Faxi keypti félögin af Karli á eina krónu hvort.
Galtalækur. Mynd: Galtalækur - Facebook
Úr Galtalæk.
Faxi ehf á dótturfélag sem heitir Faxar. Þriðja málið snýst um ráðstöfun á ýmsum eignum frá Karli þangað. Stærst þeirra var þegar Karl flutti í fyrra 1100 fermetra hús sitt nærri Lucca í Toscana-héraði á Ítalíu yfir í félagið. Húsið er metið á mörghundruð milljónir króna.
Síðustu tvö málin eru öllu smærri og snúa að ráðstöfun eigna Karls til nákominna.
Heildarkröfur í bú Karls nema um tólf milljörðum króna. Langstærsta krafan er frá þrotabúi Milestone, sem Karl var dæmdur til að greiða á sjötta milljarð, sem síðan hefur safnað miklum vöxtum. Næststærsti kröfuhafinn er Tollstjóri vegna skattakrafna af arðgreiðslum árin 2006 og 2008 upp á tæpar 700 milljónir. Aðrar kröfur eru mun minni.
