Athugið þessi frétt er meira en 7 ára gömul.

Segir Guðrúnu Bryndísi fara með ósannindi

Mynd með færslu
 Mynd:
Benedikt Þór Gústafsson, meðstjórnandi kjördæmasambands Framsóknarmanna, hefur sent frá sér yfirlýsingu. Þar segir hann Guðrúnu Bryndísi Karlsdóttur fara með ósannindi í pistli sem birtist í Kvennablaðinu í gær.

Í yfirlýsingunni segist Benedikt harma yfirlýsingu Guðrúnar Bryndísar Karlsdóttur og segir hana ósanna. Í pistlinum lýsti Guðrún Bryndís samskiptum sínum við flokksmenn í Framsóknarflokknum.  Guðrún Bryndís skipaði fyrr á árinu 2. sæti á framboðslista Framsóknarflokksins í Reykjavík. Í pistli hennar kom fram að nokkrir samflokksmanna hennar í Framsóknarflokknum, þar á meðal Benedikt Þór, hafi látið í ljósi andstöðu við byggingu mosku í Reykjavík.

Benedikt segir þetta alrangt. Hann hafi ekki stutt þann málflutning sem nú sé viðhafður um afturköllun lóð múslima eða annarra trúfélaga hér á landi. Þvert á móti hafi hann andmælt þeim málflutningi við félaga sína innan Framsóknarflokksins. „Ég hafði samband við þingflokksformann Framsóknarflokksins og tók undir hennar sjónarmið, auk þess sem ég lýsti andstöðu minni við aðra framámenn flokksins. Ég er kristinn maður og harma þá umræðu sem hefur skapast um fordóma gagnvart öðrum trúarbrögðum. Sú umræða á ekkert skylt við stefnu Framsóknarflokksins,“ segir Benedikt í yfirlýsingu sinni. Þá minnist Benedikt á samtal sitt við blaðamann Morgunblaðsins þar sem hann hafi verið spurður hvort til stæði að fjalla um málið í kosningastjórn flokksins: „Eftir á að hyggja hefði ég átt að gera blaðamanninum skýra grein fyrir minni afstöðu og lýsa andúð minni á allri mismunun og fordómum í garð mismunandi trúfélaga. Ég sé mjög mikið eftir því nú að hafa ekki gert það en á þeim tíma taldi ég að mínar prívat skoðanir ættu enga að komu að málinu,“ segir Benedikt að lokum í yfirlýsingunni.