Mjaldur. Mynd: S.Snodgrass - Wikipedia
Athugið þessi frétt er meira en 3 ára gömul.
Samþykktu 20 ára leigusamning við mjaldrafélag
Bæjarráð Vestmannaeyja samþykkti í gær 20 ára leigusamning við eitt stærsta skemmtigarðafélag heims um 800 fermetra húsnæði Fiskiðjunnar að Ægisgötu undir fiska- og náttúrugripasafn. Leiguverðið er 95 þúsund krónur á mánuði fyrstu fimm árin og tvöfaldast svo. Félagið stefnir að því að byggja annað 800 fermetra hús undir mjaldrasundlaug sunnan við Fiskiðjuna og tengja húsin saman með tengibyggingu.
Samningurinn er við The Beluga Building Company ehf., sem var sett á fót af Merlin Entertainment og stefnir einnig að því að flytja nokkra mjaldra til Íslands og hafa þá til sýnis í Klettsvík í Eyjum. Merlin Entertainment er næststærsta skemmtigarða- og afþreyingarfyrirtæki í heimi og það stærsta í Evrópu. Það rekur meðal annars alla átta Legoland-garðana sem til eru, vaxmyndasöfn undir merkjum Madame Tussauds í 21 borg og parísarhjólið London Eye, svo fátt eitt sé nefnt.
Leigusamningurinn sem bæjarráð samþykkti í gær er til 20 ára. Leiguverðið fyrir fermetrana 800 er 190 þúsund krónur á mánuði en fyrstu fimm árin verður veittur af því helmingsafsláttur. Þá fær Vestmannaeyjabær hluta af tekjum ef þær fara yfir 125 milljónir á ári. Páll Marvin Jónsson, formaður bæjarráðs, segir að Vestmannaeyjabær fengi þá 10% af umframtekjunum. Gert er ráð fyrir 30 til 40 þúsund gestum á ári.
Stofnkostnaður við safnið, þar sem lunda og hvölum verður gert sérstaklega hátt undir höfði, er áætlaður um 500 milljónir og Vestmannaeyjabær tekur engan þátt í honum. Leigusamningurinn gerir ráð fyrir að ákveði fyrirtækið að hætta starfsemi muni bærinn eignast safnið og allt tilheyrandi honum að kostnaðarlausu, að því er segir í fundargerð bæjarráðs.
„Bæjarráð fagnar þessum samningi og telur að með honum sé hagsmunum Vestmannaeyjabæjar afar vel borgið,“ segir í fundargerðinni.
Til stendur að mjaldrarnir komi til landsins í mars á næsta ári, að sögn Páls Marvins, og að safnið verði opnað samhliða því.
