Athugið þessi frétt er meira en 4 ára gömul.

Samræmd próf ganga samkvæmt áætlun

08.03.2018 - 09:34
Mynd með færslu
Samræmd próf. Mynd úr safni. Mynd: RÚV
Nemendur í 9. bekkjum grunnskóla landsins taka í dag samræmd próf í stærðfræði. Á vef Menntamálastofnunar segir að allt gangi samkvæmt áætlun. Klukkan 9 voru um 3.000 nemendur að taka prófið.

Samræmd próf í íslensku voru lögð fyrir 9. bekkinga í gær og komu þá upp tæknileg vandamál. Nemendur gátu sumir ekki skráð sig inn í prófin, sem eru rafræn. Aðrir nemendur lentu í því að þurfa nokkrum sinnum að skrá sig inn. Þegar leið á morguninn var prófinu frestað. Í tilkynningu í gær bað Menntamálastofnun nemendur afsökunar á þeim miklu óþægindum sem þeir urðu fyrir.

Samræmd próf í ensku verða lögð fyrir nemendur í 9. bekkjum á morgun, föstudag.