Samfylkingin mælist með mest fylgi flokka í Reykjavíkurborg eða 28 prósent. Flokkurinn bætir við sig manni frá síðustu könnun, verði þetta niðurstaða kosninga. Píratar missa einn mann frá síðustu könnun.

Samfylkingin fékk nítján prósent atkvæða í kosningunum í Reykjavíkurborg árið 2010. Fyrir mánuði mældist fylgið 24 prósent og nú mælist það tæp 28 prósent. Það vekur athygli að fylgi Samfylkingarinnar mældist álíka mikið í borginni fyrir sléttum fjórum árum, þá einnig einum og hálfum mánuði fyrir kosningar.

Sjálfstæðisflokkurinn fékk 34 prósent atkvæða í síðustu kosningum. Hann mældist með 24 prósenta fylgi í síðustu könnun og 25 prósent nú.

Besti flokkurinn fékk 35 prósenta fylgi í síðustu kosningum, Björt framtíð arftaki hans mældist með 23 prósenta fylgi í síðustu konnun og 24 prósenta nú.

Píratar mældust með þettán prósenta fylgi í síðustu könnun en mælast nú með tíu prósent.

Vinstri hreyfingin grænt framboð fékk sjö prósent í síðustu kosningum, mældist með tíu prósent fyrir mánuði en mælist nú með sjö prósent.

Framsóknarflokkurinn fékk tvö prósent í síðustu kosningum, mældist með fjögur prósent fyrir mánuði og þrjú prósent nú. Dögun er á svipuðum slóðum mældist með tvö prósent fyrir mánuði og þrjú prósent nú. Aðrir flokkar mælast með minna fylgi.

Ef þetta verða niðurstöður kosninga bætir Samfylkingin við sig tveimur mönnum frá síðustu kosningum og fær fimm. Sjálfstæðisflokkurinn fengi fjóra og missti því einn frá síðustu kosningum. Björt framtíð fengi fjóra og missti tvo. Píratar fengju einn en ekki tvo líkt og könnun fyrir mánuði gaf til kynna. VG heldur sínum manni.

Capacent Gallup gerði könnunina á netinu dagana 19. mars til 10. apríl og var hún lögð fyrir ríflega 2.100 manns. Sextíu prósent tóku þátt. Af þeim sem það gerðu vildu þrettán prósent ekki taka afstöðu og níu prósent sögðu ýmist ætla að skila auða eða ekki kjósa.