Sakaði Smára um meiðyrði í ræðustóli Alþingis

26.02.2019 - 16:48
Mynd með færslu
 Mynd:
Sigmundur Davíð Gunnlaugsson, formaður Miðflokksins, sagði Smára McCarthy, þingmann Pírata, hafa gerst sekur um meiðyrði með ræðu sem Smári flutti á Alþingi í dag. Sigmundur sagði Smára hafa logið og gert sér far um að stimpla inn „ógeðfellda mynd sem hann og aðrir hafa reynt að koma inn hjá fólki.“

Til snarpa orðaskipta kom milli Sigmundar Davíðs og Smára McCarthy í umræðum um frumvarp fjármálaráðherra sem mun heimila svokölluðum aflandskrónueigendum að losa krónueignir sínar að fullu. 

Smári velti því upp í ræðu sinni af hverju Miðflokkurinn vildi reyna tefja framgöngu málsins og setti það í samhengi við Wintris-málið svokallaða. „Það muna allir eftir því að sá sem talaði mest um hrægammana var einn af þeim sjálfur,“ sagði Smári. Hann vissi ekki hvernig staðan á fyrirtækinu Wintris væri en velti því upp hvort Sigmundur Davíð gæti ekki varpað ljósi á það. „Úr því að Miðflokkurinn er kominn í þennan málþófsgír, þá er rétt að spyrja, af hverju?“

Sigmundur brást reiður við ræðu Smára og sagði því fá takmörk sett hversu framganga Pírata gæti verið ógeðfelld. Það væri löngu tímabært að siðanefndin tæki mál þeirra fyrir. Hann sagði Smára hafa gerst sekan um meiðyrði því hann hefði logið og gert sér far um að stimpla inn ógeðfellda mynd sem Smári og aðrir þingmenn Pírata hefðu reynt að koma inn hjá fólki. „Ég hef aldrei haft nokkur tengsl við hrægammasjóði. Konan mín tapaði peningum þegar bankarnir hrundu og gaf þá eftir.“ 

Eftir að Wintris-málið kom upp var greint frá því á vef RÚV að Wintris, félag í eigu Önnu Sigurlaugar Pálsdóttur, hefði lýst kröfum upp á rúman hálfan milljarð í þrotabú Landsbankans, Kaupþings og Glitnis. 

Sigmundur sagði framkomu Smára setja Pírata í nýjar lægðir. „Það er fullt tilefni til að vísa framgöngu þingmannsins til siðanefndar.“

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi