Athugið þessi frétt er meira en 3 ára gömul.

Rafmagn komið á í Hveragerði og Ölfusi

08.08.2018 - 06:20
Mynd með færslu
 Mynd: Rúnar Snær Reynisson - RÚV
Fólk og fyrirtæki í Hveragerði og Ölfusi hafa haft aðgang að rafmagni í nótt, en í takmörkuðu magni þó. Búið er að sækja og tengja þrjár dísilrafstöðvar sem eiga að duga til að tryggja öllum rafmagn í dag. Allt rafmagn fór af Hveragerði og stórum hluta Ölfuss um nónbil í gær, er alvarleg bilun varð í aðveitustöð Rarik í Hveragerði. Nokkru fyrir miðnætti hafði tekist að leiða nóg rafmagn frá Selfossi og Þorlákshöfn inn á kerfið til að tryggja öllum straum sem þurftu yfir blánóttina.

 Þá er álag jafnan lítið og var enn minna nú, þar sem notendur voru beðnir að spara rafmagn og slökkva á gróðurhúsaljósum og öðrum orkufrekum raftækjum.

Halldór Guðmundur Halldórsson hjá bilanavakt Rarik sagði í samtali við fréttastofu að búið sé að tengja þrjár öflugar disilrafstöðvar við veitukerfið á svæðinu. Ein þeirra var sótt til Víkur í Mýrdal en tvær á Sauðárkrók, og talið er að þær muni duga til að sjá öllum notendum fyrir rafmagni í dag.

Halldór segir að svo virðist sem eitthvað högg hafi komið á kerfið í gær, með þeim afleiðingum að alvarleg bilun varð í 66 kV aflspenni í aðveitustöð Hvergerðinga og nágranna þeirra í Ölfusi. Hann verður tekinn niður og sendur til skoðunar og rannsóknar í Hafnarfirði, en annar spennir sóttur þangað í staðinn og tengdur í dag. Aðspurður hvort þetta séu ekki flóknir og erfiðir þungaflutningar segir Halldór svo ekki vera. Spennirinn sé ein 22 tonn að þyngd „og svolítill um sig," segir Halldór, „en við tökum af honum kælielementin til að minnka umfangið og þá kemst hann á einn tengivagn."
 

Ævar Örn Jósepsson
Fréttastofa RÚV