Procar: Krefjast ýmist skaðabóta eða riftunar

27.02.2019 - 06:51
Mynd með færslu
 Mynd:
Verið er að undirbúa kröfubréf og í öðrum tilvikum riftunarbréf fyrir tuga eigenda bíla sem áður voru í eigu bílaleigunnar Procar, að sögn Páls Bergþórssonar, lögmanns hjá Rétti.

Greint var frá því í fréttaskýringaþættinum Kveik á dögunum að átt hafi verið við kílómetrastöðu í bílum Procar og þeir svo seldir. Þetta var stundað frá árinu 2011 til 2016, hið minnsta. „Fólk fer ýmist fram á skaðabætur eða riftun og þá endurgreiðslu á öllu kaupverði bílsins. Forsendur fyrir kaupum á bílum frá Procar eru gjörsamlega brostnar og kaupsamningarnir riftanlegir. Þessir bílar eru augljóslega gölluð vara,“ segir Páll. „Fólk sem til okkar hefur leitað hefur keypt bílana úr ýmsum áttum, yfirleitt af grandlausum endursöluaðilum.“

Mynd með færslu
Páll Bergþórsson, lögmaður hjá Rétti. Mynd:

Samhliða kröfubrefunum segir Páll að til standi að kæra Procar til lögreglunnar fyrir auðgunarbrot. Hann segir það klárlega svik þegar kaupendur eru blekktir á þennan hátt. Það hve mikið bíllinn sé ekinn, ráði oft miklu um það hvort fólk ákveði að fjárfesta í honum eða ekki. Þá hafi þeir sem hafi leitað til hans margir hverjir lent í því að ýmislegt í bílunum hafi verið farið að bila mun fyrr en eðlilegt er, sé miðað við ekna kílómetra á mæli. Það geti verið mjög hættulegt og dregið úr umferðaröryggi. 

Réttur heldur einnig utan um mál bílasölunnar Bílamarkaðarins, sem er ein þeirra bílasala sem sá um að selja bíla Procar. Páll segir málið kasta ákveðinni rýrð á margar bílasölur og stéttina almennt. „Þeir eru árum saman búnir að vera með sviknar vörur frá aðilum sem þeir ættu að geta treyst.“

 

dagnyhe's picture
Dagný Hulda Erlendsdóttir
Síðast:
Þessi þáttur er í hlaðvarpi