Athugið þessi frétt er meira en 3 ára gömul.

Óttuðust um flugvél sem lenti svo á Selfossi

18.08.2018 - 15:57
Mynd með færslu
 Mynd: Ægir Þór Eysteinsson - RÚV
Mikill viðbúnaður var hjá Landhelgisgæslunni, slökkviliði, lögreglu og björgunarsveitum á þriðja tímanum í dag eftir að neyðarboð barst frá flugvél ofan af Miðdalsheiði. Vélinni var hins vegar lent vandræðalaust á Selfossi laust eftir klukkan þrjú og var viðbragðslið þá afturkallað.

Þegar ekki náðist samband við vélina eftir að neyðarsendir hennar fór af stað óttuðust menn það versta. Þyrla Landhelgisgæslunnar var send á vettvang og björgunarsveitir ræstar út, auk þess sem slökkviliðið á höfuðborgarsvæðinu sendi fjallajeppa og fjórhjól af stað og lögreglan hóf leit með dróna.

Búið var að umkringja staðinn þaðan sem neyðarboðið barst, rétt austan við Selvatn, þegar fréttist að vélin væri lent á Selfossi. Stefán Kristinsson, varðstjóri slökkviliðs, segist ekki vita hvað olli því að neyðarsendir vélarinnar virkjaðist og sambandið rofnaði.

stigurh's picture
Stígur Helgason
Fréttastofa RÚV