Mynd:
Athugið þessi frétt er meira en 10 ára gömul.
Orrustuþotur komnar til landsins
Þrjár orrustuþotur lentu á Keflavíkurflugvelli um hálfsjöleytið í gærkvöldi, og tvær vélar til viðbótar koma síðar í dag. Endurskipuleggja þurfti með hraði loftrýmisgæslu hér við land, þar sem kanadíska flugsveitin sem hingað átti að koma, var send til Líbíu nýlega.
Það er kanadíski flugherinn sem sinnir gæslunni í þetta skiptið. Nú þegar er búið að senda mannskap, tól og tæki til landsins, en í gærkvöldi lentu þrjár orrustuþotur af gerðinni F 18 á Keflavíkurflugvelli. Síðar í dag kemur ein slík í viðbót, sem og vél af gerðinni P 3 sem er notuð til að dæla eldsneyti á flugi.
Um hundrað og fimmtíu manns fylgja þessum vélum hingað til lands. Sá hópur dvelur á vallarsvæðinu næstu vikurnar. Auk loftrýmisgæslu, á til dæmis að æfa aðflug að flugvöllunum á Akureyri og Egilsstöðum.
Landhelgisgæslan tók nýlega við verkefnum Varnarmálastofnunar, sem hafði umsjón með loftrýmisgæslunni. Samkvæmt upplýsingum frá Landhelgisgæslunni, þurfti raunar að endurskipuleggja þessa gæslu með hraði nýlega þar sem flugsveitin sem átti upphaflega að sinna þessu verkefni var send á vegum Atlantshafsbandalagsins til að halda uppi flugbanni í Líbíu.
