Ólík réttindi togast á í umskurðarfrumvarpi

13.02.2018 - 22:32
Mynd: Freyr Arnarson / RÚV
Ólík sjónarmið togast á þegar kemur að því hvort banna eigi umskurð drengja, segir framkvæmdastjóri Mannréttindaskrifstofu Íslands. Réttindi barna séu að þau fái sjálf að ákveða um ónauðsynlegar læknisaðgerðir - og þá þurfi einnig að virða rétt til trúfrelsis.

Allt að þriðjungur drengja í heiminum eru umskornir. Í gyðingdómi er gert að skilyrði að drengir séu umskornir og algengt er meðal múslima að umskera. Frumvarp Silju Daggar Gunnarsdóttur alþingismanns um bann við umskurði drengja, hefur vakið mikla athygli. Samtök gyðinga á Norðurlöndunum hafa sent íslenskum þingmönnum bréf þar sem þeir mótmæla frumvarpinu harðlega og segja það árás á gyðingdóminn þannig að það snerti gyðinga um allan heim. 

„Nú er trúfrelsi mannréttindi, þú mátt trúa hverju því sem þú vilt,“ segir Margrét Steinarsdóttir, framkvæmdastjóri Mannréttindaskrifstofu Íslands. 

„En óneitanlega hljótum við samt að velta fyrir okkur hvort þetta sé hluti af trúfrelsi. Hvort það að breyta líkama barnanna þinna geti fallið fallið undir trúarskoðun eða trúfrelsi. Síðan kemur líka hið stóra álitamál og það er réttur barnsins. Við erum búin að innleiða í landslög Barnasáttmála Sameinuðu þjóðanna og skv. honum eigum við alltaf að taka mið af því sem er barninu fyrir bestu. Og maður veltir fyrir sér hvort læknisfræðilegt inngrip, sem er í rauninni ónauðsynlegt, hvort það geti talist vera barninu fyrir bestu og hvort það geti ekki verið brot á sáttmálanum, plús hitt að það á alltaf að hafa barnið með í ráðum varðandi allt sem það varðar og það eigi að taka mið af aldri þess og þroska,“ segir Margrét.

Þá kunni umskurður drengja að vera brot á mannréttindayfirlýsingu Sameinuðu þjóðanna og samningi gegn pyntingum.

Margrét veit ekki til þess að umskurður drengja hafi nokkurs staðar verið bannaður. „En ég veit að það gekk dómur í Þýskalandi t.d. þar sem það var sagt að foreldri og samþykki foreldris fyrir umskurði dygði ekki til,“ segir Margrét.

Mannréttindaskrifstofan veitti frumvarpi um bann við umskurði á kynfærum stúlkna jákvæða umsögn. Margrét segir að ekki sé hægt að líkja þessu tvennu saman. „Drengir geta áfram notið t.d. kynlífs á meðan stúlkur geta það ekki. Þannig að þetta er meira inngrip inn í líkamann. En aftur kemur að þessu saman, þetta er inngrip í líkamann og ónauðsynleg aðgerð, breyting á líkama einstaklings og ætti hann þá ekki að fá að ákveða sjálfur hvort það yrði gert eða ekki,“ segir Margrét.

Viðbúið er að kallað verði eftir umsögnum frá hinu ýmsu samtökum fari frumvarpið til þingnefndar. Samkvæmt upplýsingum frá biskupsstofu hyggst hún lýsa skoðun sinni á málinu.

 

kristins's picture
Kristín Sigurðardóttir
Fréttastofa RÚV
Síðast:
Þessi þáttur er í hlaðvarpi