Athugið þessi frétt er meira en 3 ára gömul.

Nýr ketill í Öræfajökli

Mynd með færslu
 Mynd: Ágúst Jóel Magnússon
Nýr sigketill hefur myndast í Öræfajökli á liðinni viku. Hann er um einn kílómetri í þvermál og endurspeglar aukna jarðhitavirkni í öskju jökulsins. Þetta segir í tilkynningu frá Veðurstofunni, þar sem fram kemur að ketillinn sjáist á nýlegum gervihnattamyndum af jöklinum. Þá hafi flugstjóri í farþegaflugi, Ágúst J. Magnýsson náð ljósmyndinni hér að ofan af katlinum í dag.

„Svo virðist sem jarðhitavatn hafi lekið hægt undan katlinum og komið fram undan Kvíárjökli, en brennisteinslykt hefur fundist í nágrenni við Kvíá síðastliðna viku. Líklega er mesta vatnið nú þegar runnið undan katlinum. Aukin skjálftavirkni hefur verið síðustu mánuði, en heldur hefur dregið úr henni síðustu daga. Þessi gögn benda til aukinnar virkni í eldstöðinni sem hefur ekki gosið síðan 1727.  Engin merki eru um gosóróa eða yfirvofandi eldgos,“ segir í tilkynningu Veðurstofunnar.

Landhelgisgæslan flýgur í fyrramálið með vísindamenn til að kanna aðstæður og taka sýni. Veðurstofan hefur aukið vöktun á svæðinu og fylgist vel með í samráði við jarðvísindamenn Háskóla Íslands og Almannavarnadeild Ríkislögreglustjóra.

Mynd með færslu
 Mynd: Veðurstofa Íslands
stigurh's picture
Stígur Helgason
Fréttastofa RÚV