Athugið þessi frétt er meira en 6 ára gömul.

Ný hesthúsabyggð við Gaddstaðaflatir

26.10.2015 - 15:59
Mynd með færslu
 Mynd: Samúel Örn Erlingsson - RÚV
Mynd með færslu
 Mynd: Samúel Örn Erlingsson - RÚV
Búið er að reisa fyrsta hesthúsið í nýju hesthúsahverfi við Gaddstaðaflatir, landsmótsstað Sunnlendinga við Hellu. Alllangt er síðan hverfið var skipulagt, en þar hefur ekki verið byggt fyrr en nú. Rísi fleiri hesthús á þar á næstu árum getur það breytt það miklu fyrir keppendur á svæðinu.

Kristjón Laxdal Kristjánsson hestamaður á Hellu byggir nýja hesthúsið, en burðarvirki þess reis um helgina. Hann er kunnur tamningamaður, þjálfari og ræktandi og var í 14 ár bú og ræktunarstjóri á Kvistum. Þaðan komu á þeim tíma þekktir verðlaunahestar á heimsmeistaramótum og landsmótum, eins og stóðhestarnir Muni, Ómur og Óliver.

Nýja hverfið er skipulagt í næsta nágrenni við Rangárhöllina, reiðhöll hestamanna á svæðinu. Steinsnar frá er stóðhestahús mótssvæðisins á Gaddstaðaflötum. Nýja hesthúsið er ríflega 200 fermetrar, byggt úr límtré og yleiningum, ætlað fyrir 16 hesta í eins hesta steyptum stíum.  Grafið var fyrir húsinu í haust og er stefnt að því að koma því í notkun svo fljótt sem verða má. „Ég stefni á að taka hér inn hesta fyrir jól“, segir Kristjón. Á myndinni er Kristjón við nýja hesthúsið með bróður sínum Magnúsi, sem unnið hefur ötullega að byggingunni með honum.

Samúel Örn Erlingsson
Fréttastofa RÚV