Athugið þessi frétt er meira en 9 ára gömul.

Njótum ekki fulls trausts Eyjamanna

06.08.2012 - 18:48
Mynd með færslu
 Mynd:
Formaður Þjóðhátíðarnefndar og framkvæmdastjóri ÍBV efast um að þeir njóti fulls trausts og velvildar samfélagsins í Eyjum til að stýra hátíðinni áfram. Þeir ákváðu fyrir hátíðina í ár að gefa ekki kost á sér til áframhaldandi starfa en nefndin er valin til árs í senn.

Eftir brekkusöng í Herjólfsdal í gær var tilkynnt að Páll Scheving Ingvarsson, formaður Þjóðhátíðarnefndar ÍBV, og Tryggvi Már Sæmundsson, framkvæmdastjóri félagsins, myndu ekki gefa kost á sér til áframhaldandi setu í nefndinni. Báðir hafa þeir átt sæti í Þjóðhátíðarnefnd í ríflega áratug. Það er von tvímenninganna að meiri sátt náist um Þjóðhátíð með brotthvarfi þeirra.

Minnkandi traust og velvild
Páll Scheving Ingvarsson segir að Þjóðhátíð Vestmannaeyja grundvallist á þremur þáttum; traustum hefðum, hún þurfi að fylgja takti tímans og njóta trausts og velvildar samfélagsins. „Við höfum orðið varir við að traustið og velvildin gagnvart okkar sýn og stefnu með Þjóðhátíðina hefur frekar dofnað heldur en hitt. Við teljum því rétt að stíga til hliðar og gefa nýjum mönnum kost á því að takast á við verkefnið og vonandi mun það skapa betri sátt um hátiðina og það er fyrir öllu,“ segir Páll í samtali við fréttastofu RÚV.

Kynferðisbrot ekki ástæðan
Kynferðisbrot sem nú eru til umræðu eftir Þjóðhátíð er ekki ástæða þess að þessir tveir forkólfar Þjóðhátíðar ætla að hætta. Þeir segjast hafa tekið ákvörðunin fyrir hátíðina í ár. Tryggvi Már Sæmundsson segir að þeir hafi alltaf haft öryggi gesta að leiðarljósa í sínum störfum. Hann telur það hafa verið mikið framfaraskref að setja upp eftirlitsmyndavélar í Herjólfsdal, sem dæmi sé verið að skoða myndefni frá síðasta degi hátíðarinnar vegna ofbeldismála. „Lögreglan er mjög ánægð með þetta og allir sem koma að öryggismálum hátíðarinnar. Það er okkar ósk að kerfið verði þróað áfram og settar verði upp fleiri vélar þannig að við getum náð dalnum öllum áður en yfir lýkur.“

Nánar verður rætt við Pál Scheving Ingvarsson og Tryggva Má Sæmundsson í Morgunútvarpi Rásar 2 í fyrramálið.