Athugið þessi frétt er meira en 4 ára gömul.

MMR: VG stærst - Sigmundur fengi sjö prósent

28.09.2017 - 15:41
Mynd með færslu
 Mynd: Skjáskot - RÚV
VG mælist með mest fylgi þeirra stjórnmálaflokka sem hafa boðað framboð í komandi alþingiskosningum. Flokkurinn fengi 24,7 prósent. Sjálfstæðisflokkurinn kemur næstur með 23,5 prósent. Mestu athyglina vekur að nýtt framboð Sigmundar Davíðs Gunnlaugssonar, sem hefur hlotið nafnið Miðflokkurinn, fengi 7 prósent - meira en Framsóknarflokkurinn sem fengi 6,4 prósent.

Sigmundur hætti í Framsóknarflokknum á sunnudag og greindi um leið frá því að hann ynni að stofnun nýs stjórnmálaafls. Í dag bárust svo fréttir af því að nýtt stjórnmálaafl fjölmiðlamannsins Björns Inga Hrafnssonar ætlaði að ganga til liðs við flokk Sigmundar. Hann upplýsti svo um hálf fimm leytið að flokkurinn hefði fengið nafnið Miðflokkurinn

Rétt er að geta þess að Sigmundur verður í viðtali í Kastljósi í kvöld. 

Könnun MMR var gerð dagana 26. til 28. september. Svarendur voru valdir handahófskennt úr hópi álitsgjafa MMR. Svarfjöldi var 1.012, 18 ára og eldri. 

Samkvæmt henni fengi Samfylkingin 10,4 prósent, og Píratar 10 prósent.  Flokkur fólksins mælist stærri en flokkur Sigmundar, Framsókn, Viðreisn og Björt framtíð en hann mælist með 8,5 prósent fylgi. Í síðustu könnun MMR var flokkurinn með 9,1 prósent fylgi. 

Flokkarnir Viðreisn og Björt framtíð myndu báðir falla út af þingi gengi skoðanakönnun MMR eftir í kosningunum 28. október. Viðreisn fengi 4,9 prósent en Björt framtíð aðeins 2,5 prósent. Aðrir flokkar fengju minna.

87 prósent þeirra sem tóku þátt í könnun MMR gáfu upp afstöðu sína.

 

freyrgigja's picture
Freyr Gígja Gunnarsson
Fréttastofa RÚV