Athugið þessi frétt er meira en 3 ára gömul.

Minnkandi fylgi eftir Klaustursmálið

03.12.2018 - 23:04
Mynd með færslu
 Mynd:
Fylgi Miðflokksins féll um fimm prósentustig eftir að upptökur af samtali fjögurra þingmanna hans á barnum Klaustri voru gerðar opinberar, samkvæmt Þjóðarpúlsi Gallup. 

Könnunin var gerð 3. nóvember til 2. desember. Sjálfstæðisflokkurinn mælist með mest fylgi, 24 prósent og Samfylkingin næst mest, 19 prósent. Fylgi Miðflokksins yfir tímabilið er 12 prósent. Í síðustu viku var það 13 prósent en nú, eftir að upptökurnar af Klaustri voru birtar, er það átta prósent. Fjórir þingmenn flokksins tóku þátt í samræðum þar sem ýmis ógeðfelld orð voru látin falla um fólk. Vinstri græn mælast með 11 prósent og Píratar rúm 10. Viðreisn er með tæp tíu prósent og Framsóknarflokkurinn sjö.

Sami stuðningur við Flokk fólksins

Flokkur fólksins mælist með sex prósenta fylgi og er ekki marktækur munur á fylgi hans síðan Klausturs-málið kom upp. Tveir þáverandi þingmenn flokksins tóku þátt í samræðunum á barnum Klausti. Þeir hafa verið reknir úr flokknum. Aðrir flokkar og framboð eru samkvæmt könnuninni með 1,6 prósent. Næstum 11 prósent myndu skila auðu eða ekki kjósa ef kosið yfir til Alþingis í dag. Níu prósent taka ekki afstöðu eða neita að gefa hana upp. 

Stuðningur við ríkisstjórnina minnkar

Stuðningur við ríkisstjórnina minnkar um fjögur prósentustig á milli mánaða, samkvæmt könnuninni. Rúmlega 46 prósent þeirra sem tóku afstöðu segjast styðja hana. Litlar breytingar hafa verið að fylgi flokka milli mánaða og ekki tölfræðilega marktækar.