Mynd: Anton Brink - Ruv.is
Magnús býður sig fram
Magnús Ingi Magnússon veitingamaður hefur ákveðið að bjóða sig fram til forseta Íslands. Hann segist myndu verða jákvæður forseti og almúgamaður.
Síðustu árin hefur Magnús rekið Sjávarbarinn og Texasborgara úti á Granda og veisluþjónustuna Mína menn samhliða því. Síðustu ár hefur hann svo gert sjónvarpsþættina Eldhús meistaranna sem sýndir eru á ÍNN.
Alltaf langað í framboð
Magnús sagðist í viðtali í Morgunútvarpinu á Rás 2 alltaf hafa langað í framboð. Þegar hann hafi litið yfir listann yfir frambjóðendur hafi hann talið að hann ætti alveg jafn mikinn möguleika á kjöri og þeir. „Mig langar ekki í pólitískt framboð það er svoddan úlfagryfja þar. Þetta er ágætis grundvöllur til að koma mörgum málum til greina. Það er margt sem mig langar til að gera og sérstaklega skal ég verða yfirlýsingaglaður ef ég næ þessum undirskriftum. Ég er ekkert viss um að það náist.“
Magnús segist hafa fengið mikil viðbrögð eftir að hann tilkynnti um framboðið í gær. „En við verðum að athuga það að maður er ekki kominn í framboð fyrr en maður er kominn með meðmælendur. Þá er maður kominn í framboð. Því að þetta er bara yfirlýsing frá mönnum. Þegar er búið að skila inn lista og kjörstjórnin er búin að gúddera þá, þá er maður kominn í framboð. Það á örugglega eftir að vera eitthvað þungur róður hjá mönnum.“
Aðrir bjóði upp á kleinur, því ekki hamborgara
Magnús Ingi lofaði í gær þeim sem skrifa undir undirskriftalista hans Texas-ostborgara með frönskum fyrir viðvikið, að því gefnu að þeir hafi náð kosningaaldri. Hann var í Morgunútvarpinu spurður að því hvort hann mætti gera þetta. „Er ekki á þessum kosningaskrifstofum boðið upp á kaffi, kleinur og kökusneiðar? Það er bara handhægt fyrir mig að bjóða upp á hamborgara af því ég er á hamborgastað. Ef það kemur fram að það sé bannað, þá verð ég að fá að vita það. Þá finnst mér svolítið skrýtið að það má ekki bjóða upp á veitingar fyrir viðvikið, að koma þarna og skrifa undir. Þetta er bara svona að góðum íslenskum sið að vera gestrisinn og gefa veitingar.“
Magnús segir að það væri tilvalið að bjóða ferðamönnum upp á að koma í heimsókn á Bessastaði eins og boðið sé upp á í Buckingham höll í London og Hvíta húsinu í Washington. „Ég myndi vilja koma því á, opna þetta og vera jákvæður.“
