Athugið þessi frétt er meira en 11 ára gömul.

Maðurinn fannst látinn

12.11.2011 - 12:32
Mynd með færslu
 Mynd:
Björgunarsveitarmenn fundu Daniel Markus Hoij, sænskan ferðamann, látinn í sprungu í um 600 metra hæð á Sólheimajökli klukkan 11:55. Hans hafði verið leitað í rúma tvo sólarhringa, eftir að hann óskaði aðstoðar á miðvikudagskvöld

Í tilkynningu frá lögreglustjóraembættinu á Hvolsvelli eru þakkir færðar björgunarsveitafólki, starfsmönnum Landhelgisgæslunar sem og öðrum sem lagt hafa dag við nótt síðustu daga við leitina.

Aðstæður til leitar hafi verið gríðarlega erfiðar og krafist mikillar fagmennsku af þeim sem að henni komu.

Þá segir í tilkynningu frá Slysavarnafélaginu Landsbjörg:

„Yfir 300 björgunarsveitamenn tóku þátt í leitinni í morgun, þar af voru um um 80 manns á jöklinum sjálfum. Leitin síðustu daga hefur verið afar umfangsmikil og hafa um 500 manns frá Slysavarnafélaginu Landsbjörg komið að henni frá því hún hófst á miðvikudagskvöld. Aðstæður hafa oft á tíðum verið afar erfiðar og krefjandi.

Íbúar og fyrirtæki á svæðinu hafa stutt vel við bakið á leitarfólki. Kvenfélögin Fjallkonan, Eygló og Freyja opnuðu miðstöð í skólahúsinu á Skógum þar sem björgunarlið gat hvílt sig og fengið mat, allan sólarhringinn. Segja konurnar það vera þakkir til björgunarsveita fyrir aðstoð sem þær veittu íbúum svæðisins í eldgosunum. Einnig hafa hótel og gistihús opnað dyr sínar fyrir leitarfólki, fyrirtæki gefið mat og Rauði krossin á Hvolsvelli sá um flutning aðfanga á svæðið.

Slysavarnafélagið Landsbjörg vill koma á framfæri þakklæti til allra sem að komu.“