Athugið þessi frétt er meira en 5 ára gömul.

Lögmaður mun bregðast við ásökunum um vændi

Mynd með færslu
 Mynd: Facebook
Gústaf Níelsson, fyrrverandi oddviti Íslensku þjóðfylkingarinnar í Reykjavík norður, segir að hann muni fela lögmanni að bregðast við þungum sökum sem bornar voru á hann í Forystusætinu á RÚV í gær. Þar sakaði Jens G. Jensson, oddviti flokksins í Norðvesturkjördæmi, Gústaf um að vera tengdan vændi og mansali.

Gústaf vildi ekki tjá sig um þessi ummæli í skriflegu samtali við fréttastofu utan þess að lögmaður myndi bregðast við þessum ásökunum og að það þyrfti að meta hvort Jens yrði stefnt fyrir dómi.

Jens var í gær spurður um aðdraganda þess að oddvitar flokksins í Reykjavíkurkjördæmum norður og suður, Gunnlaugur Ingvarsson og Gústaf, hafi ákveðið að draga til baka framboð sitt. „Þessir tveir menn sem þú nefnir, það var nú eitthvað aðeins fleira. Ástæðan fyrir því að þeir hafa boðað þetta á sér dýpri rætur. Þetta er fólk sem ætlaði að vera í framboði fyrir okkur en eftir á að hyggja, þegar við fengum aðvaranir sérstaklega í sambandi við Gústaf Níelsson, að þetta væri mjög vafasamur maður að hafa með. Það var dregin upp hans fortíð og hans fortíð var lögð út á netinu hjá okkur, innraneti, og þeir sem stofnuðu flokkinn, þeir sem standa að baki honum, eru heiðvirt fólk og þeim leist mjög illa á þetta,“ sagði Jens í gær.

Hann sagði að þessi meinta vafasama fortíð tengdist súlustöðum og vændi. „Það voru þarna dregin upp gömul mál í sambandi við nektarstaði og súlustaði og annað slíkt, og jafnvel tengingar við vændi og hugsanlega mansal og þetta eru hlutir sem að gerðust hérna fyrir kannski 12 til 15 árum síðan. Satt best að segja þá fékk formaður flokksins, Helgi Helgason, sent frá vini sínum, eða vinkonu sinni, sem er í rauninni andstæðingur flokksins,“ sagði Jens.

Hvorki náðist í Jens né Helga Helgason, formann flokksins, við vinnslu fréttarinnar.