Athugið þessi frétt er meira en mánaðargömul.

Lífeyrissjóðir greiða fleirum ellilífeyri

03.05.2018 - 15:28
Skrifstofa Hagstofu Íslands.
 Mynd: Þórgunnur Oddsdóttir
Ellilífeyrisþegar voru 43.650 í desember árið 2016 og örorkulífeyrisþegar 18.415. Liðlega fimmtungur fær allan ellilífeyri sinn greiddan úr lífeyrissjóði og þrír af hverjum fjórum fá greitt bæði frá Tryggingastofnun og lífeyrissjóði.

Þetta kemur fram í frétt frá Hagstofu Íslands.

Hlutfall kvenna með ellilífeyri eingöngu frá Tryggingastofnun lækkaði úr rúmum 8% í tæp 4% á árunum tíu. Hjá körlum hefur hlutfallið lækkað úr rúmum 5% í tæp 3%. „Það dregur saman með kynjunum og út úr því má lesa ákveðna kynslóðabreytingu. Það er að segja að konum sem hafa verið á vinnumarkaði og öðlast þar lífeyrisréttindi fjölgar jafnt og þétt,“ segir Kristinn Karlsson, sérfræðingur á Hagstofunni.

Frá árinu 2007 til 2016 fjölgaði ellilífeyrisþegum um tæp 22% að teknu tilliti til mannfjölda og örorkulífeyrisþegum um tæp 15% miðað við mannfjölda 18 til 66 ára. Á sama tímabili fjölgaði þeim sem bjuggu á landinu um rúmlega 7%. Ef ekki er horft til mannfjöldaþróunar þá hefur ellilífeyrisþegum fjölgað um 31% og örorkulífeyrisþegum um 24%. 

Upplýsingar Hagstofunnar taka til elli-, örorku- og endurhæfingarlífeyris auk örorkustyrks í desembermánuði ár hvert frá árinu 2007 til 2016. 

Björn Friðrik Brynjólfsson
Fréttastofa RÚV