Athugið þessi frétt er meira en mánaðargömul.

Leysir ekki viðskiptabann á íslenskar vörur

19.03.2018 - 18:12
Mynd með færslu
 Mynd: Tomasz Kolodziejski - RÚV
Formaður Samtaka fyrirtækja í sjávarútvegi segir að sá mikli áhugi sem Rússar hafa á Íslandi vegna þátttökunnar í heimsmeistarsmótinu í knattspyrnu nýtist ekki við sölu á fiskafurðum til Rússlands. Þar glími Íslendingar við viðskiptabann á pólitískum forsendum.

Sendiherra Íslands í Rússlandi, sagði í fréttum RÚV á laugardag að þátttaka Íslands á heimsmeistaramótinu í knattspyrnu skapi einstakt tækifæri til að koma íslenskum hagsmunum á framfæri í Rússlandi. Þar sé mikill áhugi á Íslandi sem beri að nýta vel. Helstu tækifærin séu við endurnýjun fiskiskipa og fiskvinnslu í Rússlandi.

Geta ekki flutt neinar afurðir til Rússlands

Íslenskir fisk- og kjötútflytjendur hafa glímt við viðskiptabann á íslenskar vörur í Rússlandi frá 2015, sem hefur valdið þeim miklu tjóni. „Meðan að þessar viðskiptaþvinganir eru ennþá fyrir hendi þá er í rauninni ekkert sem getur breytt stöðunni fyrir okkur. Og við getum ekki með neinum hætti flutt okkar afurðir til Rússlands,“ segir Jens Garðar Helgason, formaður Samtaka fyrirtækja í sjávarútvegi.

Pólitískar lausnir opni aftur rússneska markaðinn

Þarna sé um pólitíska ákvörðun rússneskra yfirvalda að ræða og athyglin í kringum HM í knattspyrnu dugi ekki til að leysa úr því. „Okkar opnun inn á rússneska markaðinn felst náttúrulega bara í pólitískum lausnum. Og ég vona bara að á einhverjum tímapunkti þá muni opnast fyrir rússneska markaðinn aftur. Þannig að ég vonast bara til að á hinu pólitíska sviði nái menn niðurstöðu og einhverri lausn í þessu máli,“ segir Jens Garðar.

 

agusto's picture
Ágúst Ólafsson
Fréttastofa RÚV