Athugið þessi frétt er meira en 4 ára gömul.

Kuldi í sjónum boðar svalari tíð

22.06.2017 - 11:01
Mynd: NOAA / The National Oceanic and Atmosph
Ný norsk rannsókn bendir til að reglubundin sveifla sé á hitastigi Golfstraumsins. Kuldi í sjónum austur af Nýfundnalandi er sjö ár að komast að Noregsströndum, en á miðju því tímabili finnum við Íslendingar fyrir meiri svala. Einar Sveinbjörnsson, veðurfræðingur, sagði frá þessu á Morgunvaktinni á Rás 1.

Í nýlegum vorleiðangri Hafrannsóknastofnunar kom í ljós að fyrir vestan land er hiti um eða undir meðallagi og selta minni en undanfarin ár. Hlýi sjórinn fyrir sunnan land hefur líka tapað seltu. Sjórinn sem kemur að landinu er ekki jafn hlýr og á síðustu undangengnu árum. Þegar selta er mikil bendir það til að sjórinn sé kominn langa leið og beri með sér mikinn varma. Á móti þessu kemur að sjórinn fyrir norðan land er enn hlýr, en fer þó kólnandi. Einar Sveinbjörnsson, verðurfræðingur,  fór yfir þetta á Morgunvaktinni og rýndi í vísbendingar sem mælingar á sjávarhita fela í sér um veður á næstu árum. „Ef við förum lengra og skoðum sjávarhita suður og suðvestur í höfum þá er er bara mjög kalt.“

Einar Sveinbjörnsson sagði frá glænýrri norskri rannsókn sem stjórnað er af Marius Årtun og sagt er frá í grein sem birt var í fyrradag. Þar kemur fram að reglubundnar fjórtán ára sveiflur séu á hitastigi í Golfstraumnum sem leitar hingað norður eftir. „Þannig að við erum kannski búin að upplifa hlýindi í sjónum og þar með heitari veðráttu hérna síðustu árin, sérstaklega árin 2003 til 2014. Síðan er sjávarhitinn farinn að síga.“ Norðmennirnir fylgja hitafrávikum yfir Atlantshafið að ströndum Noregs og auðvitað að Íslandsströndum um leið. „Þegar kólnar hér austur af Nýfundnalandi þá eru þau kuldafrávik sjö ár að komast til Noregs.“ Samkvæmt þessu kemur kuldinn sem nú mælist hér suður af tvö til þrjú ár að komast að Íslandi, og fer síðan norður fyrir land eftir þrjú til fimm ár. Eftir sjö ár kemst þessi kuldi að Noregsströndum.

„Þeir eru raunverulega að spá því að það muni kólna við Noregsstrendur um 2020. Þetta er býsna trúverðug aðferðafræði og trúverðug nálgun.“

En því má bæta við að þetta sé hinsvegar heldur leiðinleg veðurspá fyrir Ísland. Á Morgunvaktinni ræddi Einar Sveinbjörnsson kalda sumarbyrjun á Íslandi, miklar væntingar fólks um blíðviðri. Júní mælist heldur kaldur. En við vitum ekki enn hvernig júlí og ágúst verða. Enn er von.

(Meðfylgjandi mynd: The National Oceanic and Atmospheric Administration)

 

Mynd með færslu
Einar Sveinbjörnsson, veðurfræðingur.  Mynd: RÚV
Einar Sveinbjörnsson
odinnj's picture
Óðinn Jónsson
dagskrárgerðarmaður