Athugið þessi frétt er meira en 3 ára gömul.

Krefjast afturvirkra samninga

27.12.2018 - 05:38
Mynd með færslu
 Mynd: RÚV
Stéttarfélögin þrjú sem á dögunum hættu samstarfi við Starfsgreinasambandið og vísuðu kjaradeilu sinni til Ríkissáttasemjara gera kröfu um að samningar þeirra við Samtök atvinnulífsins gildi frá og með 1. janúar næstkomandi, óháð því hvenær samningar nást. Dragist samningar á langinn verði þeir einfaldlega afturvirkir til þess dags.

Fréttablaðið hefur þetta eftir Vilhjálmi Birgissyni, formanni Verkalýðsfélags Akraness, sem ásamt Eflingu og VR senda fulltrúa sína á fyrsta samningafundinn með fulltrúum SA hjá ríkissáttasemjara á morgun. Í samtali við blaðið segist Vilhjálmur ekki vænta stórtíðinda af þessum fyrsta fundi, enda sé hann fyrst og fremst hugsaður til gagnaöflunar fyrir sáttasemjara.

Ófrávíkjanleg krafa

Hann segir að það sé „ófrávíkjanleg krafa" félaganna þriggja að samningarnir verði afturvirkir til 1. janúar 2019. Það hafi áður gerst að samningar hafi ekki náðst fyrr en mörgum mánuðum eftir að fyrri samningur féll úr gildi og hver mánuður sem líði án samnings þýði að launafólk verði af allt að fjórum milljörðum króna.

Fordæmi séu fyrir því hjá ríkisstarfsmönnum að laun séu leiðrétt afturvirkt þegar svo ber undir, þótt það hafi ekki tíðkast á almenna vinnumarkaðnum. Samkomulag um afturvirkni muni gera samningsaðilum kleift að nýta tímann betur og gefa meira andrými til samninga. Náist ekki sátt um afturvirkni verði aftur á móti að hraða samningum. „Afleiðingarnar geta orðið slæmar ef sátt næst ekki,“ segir Vilhjálmur við blaðamann Fréttablaðsins. 

Ævar Örn Jósepsson
Fréttastofa RÚV