Athugið þessi frétt er meira en 3 ára gömul.

Kona fer í stríð til Cannes

Mynd með færslu
 Mynd: Kona fer í stríð

Kona fer í stríð til Cannes

16.04.2018 - 21:18

Höfundar

Kona fer í stríð, nýjasta kvikmynd leikstjórans og handritshöfundarins Benedikts Erlingssonar, hefur verið valin til þátttöku á Critics‘ Week, einni af hliðardagskrám kvikmyndahátíðarinnar í Cannes, þar sem sem hún verður heimsfrumsýnd.

Í myndinni segir frá kórstjóra á fimmtugsaldri sem ákveður að bjarga heiminum og lýsir yfir stríði gegn allri stóriðju í landinu. Hún gerist skemmdarverkamaður og er tilbúin til að fórna öllu fyrir móður jörð og hálendi Íslands, þar til munaðarlaus stúlka stígur inn í líf hennar og hún þarf að taka ákvörðun um hvort hún bjargi einu barni eða heiminum öllum.

Kona fer í stríð er önnur kvikmynd Benedikts Erlingssonar í fullri lengd á eftir Hross í oss sem kom út árið 2013. Hún vann til fjölmargra alþjóðlegra verðlauna, þeirra á meðal Norrænu kvikmyndaverðlaunanna árið 2014 og verðlauna á alþjóðlegu kvikmyndahátíðinni í San Sebastián á Spáni, alþjóðlegu kvikmyndahátíðinni í Tókýó og Tallinn Black Nights í Eistlandi.

Þrjár íslenskar myndir hafa áður tekið þátt í Critics’ Week; Ingaló eftir Ásdísi Thoroddsen árið 1992, hin norsk/íslenska Vandræðamaðurinn eftir Jens Lien tók þátt árið 2006 og fransk/íslenska stuttmyndin Víkingar eftir Magali Magistry tók þátt árið 2013.