Mynd: EPA
Komu í veg fyrir 10.000 smit
Sjálfboðaliðar Rauða krossins sem aðstoðuðu við greftrun þeirra sem létust af völdum Ebólu kunna að hafa komið í veg fyrir meira en 10.000 banvænar smitanir. Örugg greftrun hafi verið lykilatriði í að sporna gegn útbreiðslu vírussins. Þetta gefur ný rannsókn til kynna samkvæmt umfjöllun BBC. Meira en 28.000 manns smituðust af vírusnum í vestanverðri Afríku á árunum 2014 til 2015, en þar af létust 11.310.
Samfélagslegar greftranir, þar sem fólk kom saman til að þvo líkama hinna látnu, ollu fjölmörgum smitum á fyrri stigum ebólufaraldursins. Stór hluti þess að bregðast við vírusnum var því að tryggja öruggar greftranir. Þá leiddi rannsóknin í ljós að mun færri smit hefðu komið til sögunnar ef hinir smituðu hefðu fengið hjúkrun á spítala frekar en í heimahúsi.
Vestur-Afríkuríkin Gínea, Líbería og Síerra Leóne fundu mest fyrir ebólufaraldrinum.
Sjá frétt BBC hér.
