Jafnréttismálaráðherra vill láta kjósa aftur

01.05.2017 - 12:05
Mynd með færslu
 Mynd: RÚV
Þorsteinn Víglundsson, félags- og janfréttismálaráðherra, vill að Alþingi kjósi aftur í ráð og nefndir sem kosið var í í síðustu viku þar sem karlar voru í miklum meirihluta. Hann segir kosninguna vera ákaflega óheppilega og klaufalega.

Umdeild kosning

Kjör í fimm af tólf stjórnum og nefndum sem Alþingi kaus í í síðustu viku uppfyllir ekki jafnréttislög, að mati Brynhildar Flóvenz, dósents í lögfræði við Háskóla Íslands, þar sem hlutfall kvenna nær ekki 40%.

Jón Steindór Valdimarsson, varaformaður stjórnskipunar- og eftirlitsnefndar Alþingis, sagði í fréttum í gær að vinda þyrfti ofan af kjörinu. Brynjar Níelsson, formaður nefndarinnar, telur hins vegar jafnréttislög ekki hafa verið brotin.

„Ákaflega óheppilegt og klaufalegt“

Þorsteinn Víglundsson, félags- og jafnréttismálaráðherra, vill endurskoða kjörið. „Ég held að þetta sé ákaflega óheppilegt og klaufalegt, svo ekki sé fastar að orði kveðið,“ segir Þorsteinn.

Alþingi sjálft hafi staðið fyrir lagasetningu um kynjahlutföll í stjórnum fyrirtækja og stofnana með fleiri en 50 starfsmenn. Þess vegna sé ákaflega mikilvægt að þingið gangi á undan með góðu fordæmi, þegar kemur að skipan eigin stjórna og nefnda.

Ekki litið á heildarmyndina

Þorsteinn segir að þegar stjórn og stjórnarandstaða tilnefni fulltrúa hvor í sínu lagi vanti að gætt sé að jafnrétti. „Það virðist enginn hafa gáð að því hvernig heildarmyndin á þeim tilnefningum liti út, áður en það var síðan samþykkt á þinginu.“

Þorsteinn segist telja að allir hljóti að vilja setjast yfir þetta og laga. Hann vill að kosið verði upp á nýtt. „Já, kjósa þá bara aftur. Ganga bara úr skugga um það að þessi kynjahlutföll séu í lagi.“

Mynd með færslu
 Mynd: RÚV
tryggvia's picture
Tryggvi Aðalbjörnsson
Fréttastofa RÚV
Síðast:
Þessi þáttur er í hlaðvarpi