Undirtitill hátíðarinnar er Takk Ísland, og er Íslendingagata þar í borg skreytt og tileinkuð landi og þjóð með ýmiss konar landkynningu, tónleikum og hátíðarhöldum. Valdimar Guðmundsson tónlistarmaður er staddur í Vilníus og er hann einn þeirra sem stíga á stokk í kvöld. „Á Íslandsstræti er Ísland í hávegum haft, skreytingar á götunni; rautt, hvítt og blátt og menn að gera sig klára. Á götunni er mikil stemmning. Sól og næs fílingur.“
Hluti af skemmtuninni verður sýning á ísskúlptúr af tónlistarkonunni Björk Guðmundsdóttur. „Ég veit ekki alveg hver pælingin er, við erum náttúrulega Ís-land og hún er ís-lensk, þannig að það er kannski svona tengingin sem þau eru að gera.“ Aðspurður um hvort skúlptúrinn muni þola veðurblíðuna segir hann: „Ég veit ekki alveg hvar þau ætla að geyma þennan skúlptúr, kannski fer hann beint inn í ísskáp bara.“
Valdimar segir að hljómsveit hans sé ein úr hópi íslenskra sveita sem koma fram í dag, en að auki verði litháensk bönd á svæðinu. Hann segir hópinn hafa fengið mjög góðar móttökur hjá aðstandendum hátíðarinnar: „Við fórum á sögusafn þar sem við fengum svona sýndarveruleikagleraugu þar sem maður sveif um Vilníus, ýmsa staði. Maður varð bara hálf-lofthræddur að líta í kringum sig, hátt uppi í loftinu þarna. Svo fórum við inn í sal og horfðum á [innsk. blm. myndband um] sögu Litháen og hvernig þeir hafa öðlast og tapað sjálfstæði gagnvart Sovétríkjunum, sem var áhugaverð saga.“
Valdimar Guðmundsson var í símaviðtali við Morgunútvarp Rásar 2 um Íslandsdaginn í Vilníus sem haldinn er 16. júní.
