Athugið þessi frétt er meira en mánaðargömul.

Íhlutun ríkisstjórnarinnar fráleit hugmynd

12.09.2016 - 11:59
Mynd með færslu
 Mynd: Landsnet
Guðmundur Ingi Guðbrandsson, framkvæmdastjóri Landverndar, segir að ríkisstjórninni sé óheimilt að hafa áhrif á ákvarðanir úrskurðarnefndar umhverfis- og auðlindamála. Slíkt sé brot á alþjóðasamningum. 

Sigurður Ingi Jóhannsson, forsætisráðherra, sagði í fréttum RÚV í gær að stjórnvöld væru að skoða hvort ný náttúruverndarlög hefðu afturvirk áhrif, en þau voru samþykkt í nóvember á síðasta ári. Landsnet sótti um framkvæmdaleyfi hjá sveitarfélögum á Norðurlandi, fyrir lagningu Þeistareykjalínu og Kröflulínu, síðasta vetur en framkvæmdir voru stöðvaðar að kröfu Landverndar í sumar. Samtökin vísuðu þá í nýju lögin þar sem sérstaklega er kveðið á um verndun hrauns.

Yrði brot á Árósasamningi

Framkvæmdastjóri Landverndar, segir það fráleita hugmynd að ríkisstjórnin blandi sér í málið með beinum hætti meðan það er til umfjöllunar í óháðri úrskurðarnefnd. Slíkt sé brot á Árósasamningnum og öðrum alþjóðasamningum.

„Það sem að forsætisráðherra boðaði í gær, er í rauninni að fikta í löggjöfinni eftir á þannig að niðurstaða þessa óháða úrskurðaraðila sé líklegri til að henta málstað ríkisstjórnarinnar. Þetta er náttúrulega að okkar mati, með öllu ólíðandi í lýðræðisþjóðfélagi,“ segir Guðmundur Ingi.

Landsnet hafi sýnt tómlæti

Guðmundur segir að ef vilji sé til þess hjá bæði ríkisstjórn og Landsneti að leysa úr deilunni áður en úrskurðarnefnd umhverfis- og auðlindamála kveði upp úrskurð, þurfi þau að leggja til raunhæfa tillögu að línuleið sem fari ekki um hraun.

„Fyrirtækið hefur sýnt, að okkar mati, mikið tómlæti með því að í fyrsta lagi sækja seint um framkvæmdaleyfið, ekki fyrr en í mars á þessu ári, og hafa ennþá ekki komið fram með neinar lausnir í málinu þó svo að það séu tveir og hálfur mánuður síðan að fyrsti stöðvunarúrskurðurinn féll,“ segir Guðmundur Ingi.