Athugið þessi frétt er meira en 4 ára gömul.

Icelandair þarf að endursemja við lánadrottna

03.10.2018 - 10:25
Mynd með færslu
 Mynd: Ásgeir Tómasson - RÚV
Hugsanlegt er Icelandair Group geti ekki í uppgjöri þriðja ársfjórðungs uppfyllt fjárhagslegar kvaðir varðandi hlutfall heildar vaxtaberandi skulda sem getið er um í skilmálum óverðtryggðra skuldabréfa félagsins. Í uppfærðri EBITDA spá fyrirtækisins, sem birt var 27. ágúst síðastliðinn, sagði að búist yrði við minni rekstrarhagnaði en áður var talið.

 

Fyrirtækið hefur því hafið viðræður við fulltrúa skuldabréfaeigendanna sem ráða yfir meira en 50 prósent af umræddum skuldabréfaflokki, en hann ber auðkennið  ISIN NO0010776982 og er að nafnvirði 190 milljónir dala.

Í ljósi hinnar uppfærðu EBITDA spár Icelandair Group er félagið nú að meta þá möguleika sem eru í stöðunni. Stjórnendur eru til að mynda að óska eftir tímabundinni undanþágu frá hinum fjárhagslegu kvöðum frá eigendum skuldabréfanna, breytingum á skilmálum skuldabréfanna eða uppgreiðslu skuldabréfanna að hluta eða uppgreiðslu annarra skulda.

Stjórnendur segja jafnframt að þrátt fyrir möguleika á því að kvaðir skuldabréfanna um hlutfall heildar vaxtaberandi skulda verði ekki uppfylltar þá hafi handbært fé Icelandair Group numið 237 milljónum bandaríkjadala hinn 30. júní síðastliðinn. Eigið féð 530 milljónum dala og eiginfjárhlutfall félagsins hafi verið 32 prósent. „Bókfært verð varanlegra rekstrarfjármuna nam 673 milljónum dala og fyrirframgreiðslur inn á nýjar flugvélar í efnahagsreikningi námu 143 milljónum dala. Á sama tíma nam heildarfjárhæð vaxtaberandi skulda 343 milljónum dala en þar af voru 121 milljón dala veðtryggðar,“ segir í tilkynningunni.

Icelandair Group hefur ráðið DNB Bank Markets sem fjárhagslegan ráðgjafa félagsins vegna ofangreinds.

 

Jón Hákon Halldórsson
Fréttastofa RÚV