Athugið þessi frétt er meira en 8 ára gömul.

Hyggst höfða meiðyrðamál

02.07.2013 - 18:15
Mynd með færslu
 Mynd:
Hallur Magnússon, fyrrverandi sviðsstjóri hjá Íbúðalánasjóði, hyggst höfða meiðyrðamál gegn Rannsóknarnefnd Alþingis um Íbúðalánasjóð. Hallur segir ranglega staðhæft í skýrslunni að ráðning hans til Íbúðalánasjóðs hafi verið pólitísk.

Í skýrslunni segir um ráðningu Halls að það veki athygli að Hallur, sem á þeim tíma hafði lengi verið starfandi í Framsóknarflokknum, hafi verið ráðinn til stofnunarinnar, fyrst sem yfirmaður gæða- og markaðsmála en síðar sem yfirmaður þróunar- og almannatengslasviðs og að lokum sem sviðsstjóri þróunarsviðs. Ennfremur segir að ekki fáist séð að umrædd staða hafi verið auglýst er Hallur var fyrst ráðinn árið 1999. 

Hallur segir þetta alrangt, Gallup hafi séð um ráðningarferlið og metið hann hæfastan umsækjenda. Þau verkefni sem hann hafi gegnt hjá sjóðnum eftir það hafi verið á sambærilegu stjórnunarstigi en verið tilkomin vegna skipulagsbreytinga.

Hallur segir einn fulltrúa rannsóknarnefndarinnar hafa lagt sig fram um að koma athugasemdum um ráðningu Halls á framfæri á blaðamannafundi nefndarinnar. Hann hyggst því sérstaklega beina sjónum sínum að viðkomandi nefndarmanni í meiðyrðamálinu.

Samkvæmt lögum um rannsóknarnefndir Alþingis er ekki hægt að lögsækja nefndarmenn. 

Yfirlýsingu Halls má lesa hér.