Athugið þessi frétt er meira en mánaðargömul.

Húsnæðisverð hærra hér en á öðrum Norðurlöndum

08.09.2018 - 19:10
Mynd með færslu
 Mynd: RÚV
Mun fleira ungt fólk, á aldrinum 25 til 34 ára, býr í foreldrahúsum á Íslandi en annars staðar á Norðurlöndum. Þá hefur húsnæðisverð hækkað mun meira hérlendis undanfarið ár. Jarmo Lindé, forstjóri ARA, finnsku húsnæðisstofnunarinnar, segir mikilvægt að stjórnvöld vinni saman að því að auka framboð á húsnæði.

Frá árinu 2010 hefur húsnæðiskostnaður almennings hækkað um 43 prósent umfram almennt verðlag á Íslandi, samkvæmt upplýsingum frá Íbúðalánasjóði. Um þetta var meðal annars rætt á sameiginlegum fundi húsnæðisyfirvalda á Norðurlöndum, sem haldinn var á vegum Íbúðalánasjóðs í vikunni. 

Finnland sker sig úr, þegar tölur Evrópsku hagstofunnar Eurostat yfir þróun húsnæðisverðs eru skoðaðar. Ef við skoðum markaðsvirði húsnæðis á Norðurlöndunum undanfarin ár sjáum við að verðið hefur hækkað verulega - nema í Finnlandi. Þar hefur húsnæðisverð staðið nokkurn veginn í stað. Hér heima tók verðið mikinn kipp fyrir tæpum tveimur árum, og er nú það hæsta á Norðurlöndunum. 

Jarmo segir að stjórnvöld verði að taka virkan þátt í því að auka framboð á húsnæði. „Þið þurfið að gera eins og við í Finnlandi, þar sem náðst hefur samkomulag milli ríkisstjórnar og bæjarstjórna um það hvernig þau geti í sameiningu aukið framboð á húsnæði og byggt nýtt leiguhúsnæði sem er niðurgreitt því það kemur stöðugleika á húsnæðismarkaðinn í heild sinni. Borgar- og sveitarstjórnir útvega byggingarsvæði og byrggingarframkvæmdir hafa aukist til muna. Á Helsinki-svæðinum hefur náðst samkomulag milli ríkisstjórnar og borgarstjórnar um að hraða á húsnæðisuppbyggingu til að uppfylla þarfir íbúanna.“

Þá er hlutfall ungs fólks, á aldrinum 25 til 34 ára, sem enn býr í foreldrahúsum, langhæst á Íslandi, eða fjórtán prósent. Annars staðar á Norðurlöndum er hlutfallið á bilinu fjögur til sjö prósent.  

 

alma's picture
Alma Ómarsdóttir
Fréttastofa RÚV
Ásrún Brynja Ingvarsdóttir
Fréttastofa RÚV