Athugið þessi frétt er meira en 8 ára gömul.
Stórtíðindi

Hreiðar og Sigurður dæmdir

Sigurður Einarsson, fyrrverandi stjórnarformaður Kaupþings, mætti í fylgd fangavarða í Héraðsdóm Reykjavíkur. Mynd: Tryggvi Aðalbjörnsson / RÚV
 Mynd: Tryggvi Aðalbjörnsson / RÚV
Sigurður Einarsson, fyrrverandi stjórnarformaður Kaupþings, var í dag dæmdur í eins árs fangelsi í stóra markaðsmisnotkunarmálinu í Hérðasdómi Reykjavíkur. Hreiðar Már Sigurðsson var einnig sakfelldur, en honum var ekki gerð refsing umfram þann fangelsisdóm sem hann hlaut í Al-Thani málinu.

Samkvæmt upplýsingum fréttastofu bætist dómur Sigurðar ofan á þann fjögurra ára dóm sem hann hlaut í Al-Thani málinu.

Ingólfur Helgason, fyrrverandi forstjóri Kaupþings á Íslandi, var dæmdur í fjögurra og hálfs árs fangelsi.

Magnús Guðmundsson, fyrrverandi bankastjóri Kaupþings í Lúxemborg, var sýknaður auk þess sem tveimur ákæruliðum á hendur honum var vísað frá dómi.

Bjarki Diego, fyrrverandi framkvæmdastjóri útlána Kaupþings, var dæmdur í tveggja og hálfs árs fangelsi. 

Björk Þórarinsdóttir, sem sat í lánanefnd Kaupþings, var sýknuð. 

Einar Pálmi Sigmundsson, fyrrverandi yfirmaður eigin viðskipta Kaupþings, var dæmdur í tveggja ára skilorðsbundið fangelsi.

Pétur Kristinn Guðmarsson og Birnir Sær Björnsson, fyrrverandi starfsmenn eigin viðskipta, voru dæmdir í 18 mánaða skilorðsbundið fangelsi. 

Aðalmeðferð í málinu hófst í lok apríl og voru réttarhöldin þau umfangsmestu í íslenskri réttarsögu. Um fimmtíu vitni voru leidd fram og réttarhöldin tóku margar vikur. Þau snerust um meint sýndarviðskipti níumenningana með hlutabréf í Kaupþingi. Í ákæru sérstaks saksóknara því haldið fram að blekkingar og sýndarmennska hafi verið grunnur þessara umfangsmiklu viðskipta.

Málsvarnarlaun verjenda voru yfir 250 milljónir króna. Þar af á ríkissjóður að greiða hátt í 100 milljónir en sakborningar afganginn.