Helgi harmar ummæli Önnu Kolbrúnar

06.12.2018 - 14:49
Mynd með færslu
 Mynd: RÚV
Helgi Bernódusson, skrifstofustjóri Alþingis, harmar ummæli Önnu Kolbrúnar Árnadóttur, þingmanns Miðflokksins, í Bítinu á Bylgjunni í gær, þar sem hún gaf í skyn að ummælin á Klausturbarnum væru hluti af kúltúr sem starfsmenn Alþingis tækju þátt í. Helgi mótmælir þessu í yfirlýsingu til fjölmiðla, og einnig í bréfi sem hann sendi öllum starfsmönnum Alþingis í gærkvöldi. Helgi mótmælir því að starfsmenn þingsins séu dregnir inn í þá umræðu sem hefur orðið í tengslum við Klausturmálið.

Anna Kolbrún var í viðtali í Bítinu í gær, þar sem Klausturmálið var til umfjöllunar. Þar sagði hún meðal annars:

„Við höfum kannski stundum haldið að þetta sé fólkið, að þetta séu alþingsmenn sem skapa þennan kúltúr. En ég er svolítið farin að efast um að það séu bara alþingsmenn,“ sagði Anna Kolbrún. „Ég er að tala um stofnunina Alþingi vegna þess að starfsmennirnir, það eru allir mannlegir, þeir fara líka inn í þennan kúltúr þegar þeir fara þarna.“

Yfirlýsing Helga vegna þessara ummæla er svohljóðandi:

Í viðtali á Bylgjunni í gærmorgun sagði Anna Kolbrún Árnadóttir alþingismaður að á Alþingi væri mjög sérstakur kúltúr og mátti skilja af orðum hennar að starfsmenn Alþingis væru hluti af honum. Sem skrifstofustjóri Alþingis, og fyrirsvarsmaður starfsmanna þess, vil ég mótmæla þessum ummælum og að starfsmenn Alþingis séu á einn eða annan hátt dregnir inn í þá umræðu sem orðið hefur í fjölmiðlum um samtöl nokkurra þingmanna um samþingsmenn sína og fleiri á veitingahúsi í nágrenni þingsins.

Þegar starfsmenn hefja störf á Alþingi er brýnt fyrir þeim að sýna háttvísi í hvívetna og koma fram gagnvart þingmönnum og öðrum starfsmönnum af virðingu og nærgætni í orðum og allri framkomu. Á þetta er jafnframt minnt á starfsmannafundum skrifstofunnar. Ég man ekki til þess að undan starfsmönnum hafi verið kvartað að þessu leyti. Starfsmenn skrifstofu Alþingis leggja metnað sinn í að sinna störfum sínum af einlægni og fagmennsku.

Ég harma þessi ummæli þingmannsins, því að þau eiga ekki við rök að styðjast, og vona að þau séu mælt í ógætni, enda fylgdu með þakklætis- og hrósyrði um starfsmennina sem þakka ber.

johann's picture
Jóhann Bjarni Kolbeinsson
Fréttastofa RÚV
Síðast:
Þessi þáttur er í hlaðvarpi