Heimir hættir við framboð

20.04.2016 - 07:50
Mynd með færslu
 Mynd: Himir Örn Hólmarsson - Heimir Örn Hólmarsson
Heimir Örn Hólmarsson sem tillkynnti fyrr í vor að hann ætlaði að bjóða sig fram til embættis forseta Íslands hefur dregið framboð sitt til baka. Hann segir í yfirlýsingu að ljósi framboðs sitjandi forseta, Ólafs Ragnars Grímssonar, hafi hann ákveðið þetta.

Þriðji frambjóðandinn sem hættir við

Hann segist vænta þess af frambjóðendum að þeir berjist áfram fyrir breytingum í samfélaginu. Heimir er þriðji frambjóðandinn sem dregur framboð sitt til baka eftir að Ólafur Ragnar Grímsson lýsti því yfir á mánudag að hann hyggðist sækjast eftir endurkjöri. Hinir eru Vigfús Bjarni Alfreðsson og Guðmundur Franklín Jónsson.

 

Yfirlýsing Heimis í heild:
Í ljósi framboðs sitjandi forseta hef ég ákveðið að draga framboð mitt til baka.
Ég fór í þetta framboð með það að markmiði að taka þátt í að breyta samfélaginu sem við búum í til hins betra. Við búum í dag við að brotið er á mannréttindum fólks, minnihlutahópar eru útskúfaðir og lýðræði ræður ekki ríkjum.
Með framboði mínu vildi ég leggja áherslur á grunnstoðir samfélags okkar Íslendinga. Má þar nefna bætt siðferði í íslenskri stjórnsýslu, tala fyrir bættri geðheilbrigðisþjónustu, vekja máls á mannréttindum öryrkja og aðgengismálum þeirra og gefa fólkinu í landinu rödd við lagasetningu í okkar samfélagi.
Ég vænti þess af frambjóðendum að þau berjist áfram fyrir breytingum í samfélaginu, að þau hvetji þjóðina til að taka skrefið fram á við og þau standi vörð um mannréttindi. Það þarf að uppræta fordóma og siðleysi.
Ég mun áfram stuðla að betra samfélagi og láta mig dreyma um að þessi málefni fái framgang í okkar samfélagi í framtíðinni. Ég óska öllum frambjóðendum góðs gengis. Að lokum vil ég þakka öllum þeim sem hafa stutt mig í þessari vegferð. Stuðningurinn sem ég hef fundið fyrir er mér ómetanlegur.
Áfram Ísland.

 

 

kristjas's picture
Kristján Sigurjónsson
Fréttastofa RÚV
Síðast:
Þessi þáttur er í hlaðvarpi