Athugið þessi frétt er meira en 9 ára gömul.

Hefur viðræður við Sjálfstæðisflokk

Mynd með færslu
 Mynd:
Sigmundur Davíð Gunnlaugsson, formaður Framsóknarflokksins, hefur ákveðið að hefja formlegar stjórnarmyndunarviðræður við Sjálfstæðisflokk. Sigmundur segir undirbúningssamtöl sín við Bjarna Benediktsson, formann Sjálfstæðisflokksins, gefa til kynna að þar sé góður vilji til að vinna að skuldamálum.

Sigmundur Davíð sendi frá sér yfirlýsingu á fimmta tímanum þar sem þetta kemur fram. Hann segist þar hafa átt gagnleg samtöl við forystumenn þeirra flokka sem fengu þingmenn kjörna í kosningunum í síðasta mánuði, þar sem hann hafi lagt áherslu á leiðréttingar á skuldum heimilanna. Sigmundur metur samtöl sín við Bjarna þannig að góður vilji sé til að vinna að útfærslu á aðgerðum vegna skuldamála heimilanna. Þá verði horft til þeirra hugmynda að lausn sem Framsóknarflokkurinn hafi unnið og kynnt og jafnframt til þeirra útfærslna sem Sjálfstæðisflokkurinn hafi lagt áherslu á.

Í yfirlýsingu sinni segir Sigmundur Davíð að margvísleg mál sem geti haft mikil áhrif á velferð þjóðarinnar bíði úrlausnar. Því sé eðlilegt að leitast við að mynda stjórn með nógu öflugan meirihluta til að sinna óvenju vandasömum verkefnum, í það minnsta í fyrstu atrennu.

 

Yfirlýsing Sigmundar er svohljóðandi:

Frá því að forseti Íslands veitti mér umboð til að hefja stjórnarmyndunarviðræður s.l. þriðjudag hef ég átt mjög gagnleg undirbúningssamtöl við forystumenn þeirra flokka sem fengu þingmenn kjörna í kosningunum í apríl. Ég hef einnig notað tímann til að fara yfir og rifja upp helstu áhersluatriði flokkanna í kosningabaráttunni sem á undan fór.

Af hálfu míns flokks hef ég lagt áherslu á þau mál sem flokkurinn setti í forgang fyrir kosningar, einkum leiðréttingu á skuldum heimilanna. Auk þess hafa ýmis önnur mál verið reifuð. Þótt skoðanir séu skiptar um sumt, eins og vænta mátti, er mikill samhljómur í afstöðu flokka til margra mála. Það gefur von um að stjórnmálamenn ólíkra flokka muni geta sameinast um ýmis framfaramál á kjörtímabilinu.  

Það er niðurstaða mín að hefja nú formlegar stjórnarmyndunarviðræður á milli Framsóknarflokks og Sjálfstæðisflokks. Ég met undirbúningssamtöl mín við formann Sjálfstæðisflokksins svo að góður vilji sé til þess af hans hálfu að vinna að útfærslu á aðgerðum vegna  skuldamálanna með árangur fyrir heimilin í forgrunni lausnanna. Verði í því augnamiði horft til þeirra hugmynda að lausn sem Framsókn hefur unnið að og kynnt og jafnframt og um leið til þeirra útfærslna sem Sjálfstæðisflokkurinn hafði lagt áherslu á, sem leið að sama marki.

Eins og ég hef lagt áherslu á má tengja lausn þessara mála þeirri staðreynd að kröfuhafar í bú föllnu bankanna verða að sæta afföllum af kröfum sínum. Líkur standa til að fyrrgreindum aðilum sé þessi staða ljós. Ekki er því stefnt að því að endurreisn heimilanna valdi ríkissjóði búsifjum sem hann má ekki við.

Margvísleg önnur mál bíða úrlausnar á kjörtímabilinu, mál sem geta haft mikil áhrif á velferð þjóðarinnar í bráð og lengd. Því er eðlilegt að leitast verði við, a.m.k. í fyrstu atrennu, að mynda stjórn með nægjanlega öflugan þingmeirihluta til að ríkisstjórn sem við hann styðst hafi afl til að sinna óvenju vandasömum verkum. Einnig er sjálfsagt við upphaf formlegra stjórnarmyndunarviðræðna að hafa ríka hliðsjón af þeim skilaboðum sem lesa má úr niðurstöðum nýafstaðinna kosninga.