Athugið þessi frétt er meira en mánaðargömul.

Hátíðarviðburður fullveldisdagsins í Hörpu

Íslendingasögur - sinfónísk sagnaskemmtun er hátíðarviðburður fullveldisdagsins sem haldinn er í Hörpu. Þar verður nýstárleg sýning í tali og tónum, byggð á sögum Íslendinga fyrr og nú, ofin í myndrænan ljósagjörning.

Katrín Jakobsdóttir forsætisráðherra, Guðni Th. Jóhannesson forseti Íslands og Margrét Þórhildur Danadrottning ávarpa samkomuna.

Sinfóníuhljómsveit Íslands ásamt einleikurum, söngvurum og leikurum spinna sinfónískan sagnavef ásamt kórunum Schola cantorum og kór Menntaskólans við Hamrahlíð.

 Í sýningunni er horft fram á veginn til næstu 100 ára með sögu síðustu aldar í farteskinu. Í þessum sinfóníska vef verða fólgnar fjölbreyttar gersemar, t.d. verður frumflutt sigurlag samkeppni afmælisnefndar fullveldisafmælisins, „Landið mitt“ eftir Jóhann G. Jóhannsson, auk frumflutnings á verki eftir Báru Gísladóttur sem samið var gagngert fyrir þetta tilefni. Þá verður flutt ný útgáfa verksins Ad Genua eftir Önnu Þorvaldsdóttur við texta Guðrúnar Evu Mínervudóttur. Þar er um að ræða frumflutning á Íslandi. Listrænn stjórnandi sýningarinnar er Arnbjörg María Danielsen sem ásamt danska video-listamanninum Lene Juhl Nielsen og ljósahönnuðinum Kasper Wolf Stouenborg annast sjónræna útfærslu og umgjörð sýningarinnar.

Listrænn stjórnandi sýningarinnar er Arnbjörg María Danielsen. Hljómsveitarstjóri er Bjarni Frímann Bjarnason. Sýningin er unnin er í samstarfi við Sinfóníuhljómsveit Íslands, Hörpu og RÚV.