Athugið þessi frétt er meira en 4 ára gömul.

Hallgrímur fær viðurkenningu Rithöfundasjóðs

Mynd með færslu
 Mynd: RÚV

Hallgrímur fær viðurkenningu Rithöfundasjóðs

04.01.2018 - 16:52

Höfundar

Menningarviðurkenningar RÚV fyrir árið 2017 voru veittar í dag við hátíðlega athöfn. Hallgrímur Helgason hlaut viðurkenningu Rithöfundasjóðs Ríkisútvarpsins fyrir ritstörf. Hljómsveitin Mammút hlaut viðurkenningu fyrir framúrskarandi flutning og alls voru 92 styrkir veittir úr Tónskáldasjóði Ríkisútvarpsins og STEFs. Einnig var tilkynnt hvert orð ársins 2017 er.

Guðni Th. Jóhannesson, forseti Íslands, Lilja Dögg Alfreðsdóttir mennta- og menningarmálaráðherra og fleiri góðir gestir voru við athöfnina sem send var út í beinu myndstreymi á menningarvef RÚV og útvarpað á Rás 1.Veitt var viðurkenning úr Rithöfundasjóði og styrkir úr Tónskáldasjóði Ríkisútvarpsins. Auk þess veitti Rás 2 Krókinn, verðlaun fyrir framúrskarandi lifandi flutning árið 2017 og tilkynnt var um valið á orði ársins. Sigurlaug M. Jónasdóttir var kynnir á athöfninni, Frímann Gunnarsson tilkynnti um val á orði ársins og þau Anna Gréta Sigurðardóttir, Einar Scheving og Þorgrímur Jónsson fluttu tónlistaratriði.

Mynd með færslu
 Mynd: RÚV
Hallgrímur Helgason.

Hallgrímur Helgason hlaut viðurkenningu Rithöfundasjóðs Ríkisútvarpsins fyrir ritstörf. Í rökstuðningi úthlutunarnefndar segir meðal annars: „Íslenskum bókaunnendum varð snemma ljóst að þar fór höfundur sem vildi ekki aðeins skrifa sig inn í íslenska bókmenntasögu sem ungur og metnaðarfullur höfundur, heldur líka gera það með nýjum hætti og vera öðruvísi en hinir sem þá þegar voru orðnir þekktir af verkum sínum.“ Hljómsveitin Mammút hlaut Krókinn 2017 – viðurkenningu Rásar 2, fyrir framúrskarandi flutning á árinu.

Mynd með færslu
Mammút við afhendingu verðlaunanna

Orð ársins 2017

Epalhommi er orð ársins 2017. Sindri Sindrason fréttamaður á Stöð 2 ræddi við Töru Margréti Vilhjálmsdóttur, formann Samtaka um líkamsvirðingu, í tengslum við grasrótarhátíðina Truflandi tilvist þann 6. mars 2017. Tara Margrét sagði að maður í forréttindastöðu, eins og Sindri, gæti ekki sett sig í spor fólks í jaðarhópum sem verður fyrir fordómum annarra. Sindri taldi þá upp nokkra minnihlutahópa sem hann tilheyrði. Svar Sindra vakti harkaleg viðbrögð á samfélagsmiðlum og meðal annars talaði Hildur Lilliendahl Viggósdóttir um kúgaða, hvíta, ófatlaða epalhommann og þar birtist orðið fyrst. Daginn eftir, 7. mars, birtist opnuauglýsing frá versluninni Epal í dagblöðum. Auglýsingin er einfaldlega mynd af sex þekktum hommum í verslun Epals og er hún án orða. Hér á vel við orðtakið þeir skilja sem vilja því að með þessari orðlausu auglýsingu var merkingu orðsins epalhommi snúið við. Það var sett fram í niðrandi merkingu en snúið upp í jákvæða. Í íslenskri nútímamálsorðabók á vefgáttinni málið.is er orðið epalhommi sagt merkja, „samkynhneigður karlmaður sem hefur áhuga á vandaðri hönnun.“   

Alls voru 92 styrkir veittir úr sameinuðum Tónskáldsjóði Ríkisútvarpsins og STEFs árið 2017, en sjóðurinn hefur það markmið að stuðla að frumsköpun og útbreiðslu íslenskrar tónlistar. Sjóðurinn veitir fjárstuðning til höfunda fyrir tónsmíði og heildstæð verk og er sérstaklega horft til fagþekkingar auk þess sem metnaðarfyllri og yfirgripsmeiri verkefni hljóta forgang. Einnig er tilgangur sjóðsins að veita fjárstuðning við nýsköpun verka til flutnings í miðlum RÚV. 

Styrkina á síðasta ári hlutu Anna Þorvaldsdóttir, Auðunn Lúthersson, Áskell Másson, Bára Gísladóttir, Bergrún Snæbjörnsdóttir, Bryndís Jakobsdóttir, Daníel Helgason, Davíð Brynjar Franzson, Davíð Þór Jónsson, Egill Ólafsson, Elín Gunnlaugsdóttir, Erik DeLuca, Finnur Karlsson, Finnur Torfi Stefánsson, Guðmundur Pétursson, Gunnar Andreas Kristinsson, Hafdís Bjarnadóttir, Haraldur V. Sveinbjörnsson, Haukur Freyr Gröndal, Haukur Þór Harðarson, Haukur Tómasson, Hera Hjartardóttir, Hilmar Örn Hilmarsson, hljómsveitin Nýdönsk, hljómsveitin Valdimar, Hlynur Aðils Vilmarsson, Hreiðar Ingi Þorsteinsson, Hugi Guðmundsson, Indriði Arnar Ingólfsson, Ingi Bjarni Skúlason, Ingibjörg Ýr Skarphéðinsdóttir, Jesper Pedersen, Jóhann G. Jóhannsson, Jónas Sigurðsson, Jónas Tómasson, Karólína Eiríksdóttir, Kári Einarsson, Kolbeinn Bjarnason, Kristinn Roach, Kristín Þóra Haraldsdóttir, Kristófer Rodrigez, Lára Rúnarsdóttir, Lára Sóley Jóhannsdóttir, Leifur Gunnarsson, Leifur Þórarinsson, Listahátíð Reykjavíkur, Marketa Irglova, Mezzoforte, Oliver Kentish, Ómar Guðjónsson, Páll Ragnar Pálsson, Ragnheiður Erla Björnsdóttir, Sigmar Þór Matthíasson, Sigrún Jónsdóttir, Sigurður Árni Jónsson, Sigurður Bjóla Garðarsson, Sigurður Sævarsson, Soffía Björg Óðinsdóttir, Steingrímur Þórhallsson, Stuðmenn, Sunna Gunnlaugsdóttir, Sveinn Lúðvík Björnsson, Unnar Gísli Sigurmundsson, Unnur Sara Eldjárn, Valgeir Sigurðsson, Yrkja III – Tónverkamiðstöð, Þorsteinn Gunnar Friðriksson, Þóranna Dögg Björnsdóttir, Þórunn Gréta Sigurðardóttir, Þórunn Guðmundsdóttir, Þráinn Hjálmarsson, Þuríður Jónsdóttir og Örvar Smárason.

Menningarsjóðir á vegum RÚV hafa verið starfræktir í fjölda ára, þeir elstu í meira en 60 ár. Markmiðið með þeim er að  efla menningarlífið  í landinu með fjárframlögum til listamanna.