Mynd: EPA
Athugið þessi frétt er meira en 3 ára gömul.
Hættan eykst á skæðum ebólufaraldri
Hættan á að skæður ebólufaraldur brjótist út í Austur-Kongó hefur aukist til muna eftir að íbúi stórborgarinnar Mbandaka greindist með ebólu í vikunni. Oly Ilunga Kalenga, heilbrigðisráðherra landsins, segir faraldurinn í raun hafa komist á annað og alvarlega stig við þessi tíðindi, en um ein milljón manna býr í Mbandaka. Talið er að minnst 23 hafi dáið af völdum ebólu-veirunnar síðan hennar varð fyrst vart í Austur-Kongó eftir nokkurt hlé, í apríl síðastliðnum.
Alþjóða heilbrigðisstofnunin, WHO, hefur þegar sent 4.000 skammta af nýju bóluefni til landsins í von um að takast megi að kæfa faraldurinn í fæðingu. Bóluefnið er þó enn í þróun og varað er við of mikilli bjartsýni um virkni þess. Hin látnu og önnur sem greinst hafa með veiruna hafa öll búið á dreifbýlum svæðum, en smithættan - og þar með hættan á raunverulegum faraldri - margfaldast í þéttbýli stórborgarsamfélagsins.
