Mynd:
Athugið þessi frétt er meira en 9 ára gömul.
Hæstiréttur úrskurði um völd forseta
„Enginn á að geta verið úrskurðaraðili þegar kemur að stjórnarskrá og eigin embættisverkum," sagði Jón Þór Ólafsson, þingmaður Pírata, við upphaf þingfundar. Hann lýsti því þá yfir vilja til að fá dómstóla til að kveða á um valdmörk forseta Alþingis.
Jón Þór lýsti fyrir nokkru yfir að hann hygðist ekki nota orðin háttvirtur um þingmenn og hæstvirtur um ráðherra í ræðum sínum á Alþingi. Jón Þór sagði á þingi í dag að þetta hefði orðið til þess að forseti slægi í bjölluna í hvert sinn sem hann sleppti þessum heitum. Það yrði til að trufla þingmanninn í störfum sínum á Alþingi.
Jón Þór sagði að hingað til hefði forseti úrskurðað um túlkun á þingsköpum, þar á meðal um sín eigin embættisverk. Því hefði hann í samstarfi við lögmann Pírata skoðað að fara fyrir dómstóla. Þannig væri hægt að fá Hæstarétt til að fá kveðið upp úr um hvort þetta gengi, að forseti gæti í raun verið stjórnvald sem stýrði störfum þingsins. Jón Þór sagðist hafa fengið þá ábendingu að slíku máli yrði vísað frá dómi en sagði að þá væri þó fengin staðfesting á því að forseti sé úrskurðaraðili á þingi.
Undir lok ræðu Jóns Þórs sló Einar K. Guðfinnsson, forseti Alþingis, á bjöllu sína og sagði að ræðunni lokinni: „Forseti gladdist svo yfir ávarpi háttvirts þingmanns að hann kaus að beita bjöllunni af varkárni að þessu sinni." Og uppskar þá nokkurn hlátur. Nokkrum mínútum síðar heyrðist öllu meira í bjöllu forseta þegar Helgi Hjörvar, þingmaður Samfylkingar, var í ræðustól. Þá talaði hann um svikin loforð ríkisstjórnarinnar og dvaldi þar lengur en tímamörk leyfa.
