Athugið þessi frétt er meira en 5 ára gömul.

Gagnrýna tökur Fast 8 við Mývatn

Mynd með færslu
 Mynd: Sigurbjörn Ásmundsson - RÚV

Gagnrýna tökur Fast 8 við Mývatn

02.05.2016 - 07:03

Höfundar

Félag kvikmyndagerðarmanna gerir athugasemdir við frumvarp iðnaðarráðherra um hækkun tímabundinnar endurgreiðslu vegna kvikmyndagerðar á Íslandi. Félagið krefst þess meðal annars að það verði skilyrði fyrir endurgreiðslu að þjónustufyrirtæki og þeir sem kaupi þjónustu virði íslensk lög um vinnutíma, laun, aðbúnað og hollustuhætti svo og íslenska kjarasamninga að fullu. Félagið gagnrýnir jafnframt tökur Fast 8 við Mývatn.

Til stendur að hækka hlutfall endurgreiðslunnar úr 20 prósentum í 25 prósent. Þetta er meðal annars gert til að bregðast við aukinni samkeppni um erlend kvikmyndaverkefni frá löndum eins og Noregi. Þarlend stjórnvöld vilja auka veg norskrar náttúru í erlendum kvikmyndum. 

Þjónusta við erlend kvikmyndaverkefni hefur verið í miklum blóma hér á landi undanfarin ár - farið hafa fram tökur fyrir sjónvarpsþættina Fortitude og Game of Thrones og svo fyrir stórmyndir á borð við Noah, The Secret Life of Walter Mitty, Star Wars: The Force Awakens, Star Wars: Rogue One og nú nýverið Fast 8.  Framleiðslukostnaður síðastnefndu myndarinnar nam 2,8 milljarði króna hér á landi en tökur fóru meðal annars fram við Mývatn og á Akranesi.

Félag kvikmyndagerðarmanna, FK, gerir athugasemdir við að ekki hafi verið haft fullt samstarf við félagið við smíði frumvarpsins.  Því hafi boðist að koma að athugasemdum á lokametrunum en ekki hafi verið brugðist við þeim þegar frumvarpið var lagt fram á Alþingi um miðjan mars. Félagið styður frumvarpið en þó ekki athugasemdalaust, eins og kemur fram í umsögn þess til atvinnuveganefndar Alþingis. 

Félagið segir í umsögn sinni að brýnt sé að lágmarksfjöldi íslenskra eða evrópskra faglærðra kvikmyndagerðarmanna starfi við þau verkefni sem gjaldgeng séu til endurgreiðslu - það hlutfall verði um 30 prósent.

Þá bendir FK á að brögð séu að því að „sumir íslenskir framleiðendur og þjónustufyrirtæki láti starfsfólk skrifa undir samninga sem innihalda ólögleg ákvæði um vinnutíma.“ Félagið segir enn fremur að borið hafi á því að brotið sé á fólki hvað varðar hvíldartíma, öryggi á tökustað og aðbúnað. Það verði því skilyrði að þeir sem ætli að nýta sér endurgreiðsluna virði íslensk lög um vinnutíma, laun, aðbúnaða og hollustuhætti.

FK gerir jafnframt athugasemdir við tökur Fast 8 á Mývatni. „Nú nýlega var viðkvæmu vistkerfi Mývatns og Langavatns raskað með sprengingum og bílaumferð útá ís sem endaði með ósköpum, m.a með tveimur gröfum sem sukku í vatnið með tilheyrandi mengun og raski.“

Slíkt telur félagið óásættanlegt þegar um slíkar náttúruperlur er að ræða „og svo ekki minnst á það að um er að ræða fiskivötn.“ Skylda þurfi tökulið til að umgangast náttúru landsins af virðingu og fullri sátt við náttúruverndarsjónarmið.

Umhverfisstofnun komst að þeirri niðurstöðu að lítil sem engin mengun hefði orðið af því þegar gröfurnar tvær féllu ofan í Mývatn.  Stofnunin gaf út þrjú leyfi fyrir tökunum við og á Mývatni. Í síðasta leyfinu, sem gefið var út 1. apríl, var tökuliðið þó beðið um að lágmarka fjölda bifreiða og tækja á ísnum hverju sinni til að draga úr óþarfa áhættu.

Stofnunin bannaði athafnir sem á svæðum sem gætu verið með veikum blettum. Girða átti slík svæði af og halda allri umferð frá þeim. Veiðimálastofnun sagði, þegar tökuliðið fékk leyfi til sprenginga á Langavatni, að fiskur gæti drepist en áhrifin væru tímabundin og staðbundin.

Félag kvikmyndagerðarmanna var stofnað 1966 og er heildarsamtök kvikmyndagerðarmanna. Formaður þess er Hrafnhildur Gunnarsdóttir. 

 

Tengdar fréttir

Skútustaðahreppur

Fast 8 kemur með 2,6 milljarða til landsins