Athugið þessi frétt er meira en 4 ára gömul.

Fundu gat á sjókví Arnarlax í Arnarfirði

22.01.2019 - 16:39
Mynd með færslu
 Mynd: Jóhannes Jónsson - Ríkisútvarpið ohf
Matvælastofnun barst í dag tilkynning frá Arnarlaxi um gat á nótarpoka einnar sjókvíar Arnarlax við Hringsdal í Arnarfirði. Gatið uppgötvaðist við skoðun kafara í morgun og er viðgerð lokið, að því er fram kemur í fréttatilkynningu frá Matvælastofnun.

Atvikið er nú til meðferðar hjá Matvælastofnun. Eftirlitsmenn stofnunarinnar munu skoða aðstæður hjá fyrirtækinu og fara yfir viðbrögð þess. Arnarlax hefur lagt út net í samráði við Fiskistofu til að kanna hvort slysaslepping hafi átt sér stað. 

Samkvæmt upplýsingum frá Arnarlaxi voru um 157.000 laxar í kvínni. Gatið var um 15x50 sentimetrar og á 20 metra dýpi. 

solveigk's picture
Sólveig Klara Ragnarsdóttir
Fréttastofa RÚV