Athugið þessi frétt er meira en 10 ára gömul.

Frumvarp um stöðu íslenskrar tungu

24.02.2011 - 16:50
Mynd með færslu
 Mynd:
Katrín Jakobsdóttir, mennta- og menningarmálaráðherra, mælti á Alþingi í dag fyrir frumvarpi til laga um stöðu íslenskrar tungu og íslensks táknmáls.

Í kjölfar þess fór fram umræða þar sem þingmenn lýstu yfir ánægju með frumvarpið og var því síðan vísað til umfjöllunar í menntamálanefnd Alþingis. Í tilkynningu frá ráðuneytinu kemur fram að markmið frumvarpsins sé að festa í lög stöðu íslenskrar tungu. Jafnframt gerir frumvarpið ráð fyrir að íslenskt táknmál verði viðurkennt í lögum sem fyrsta mál þeirra sem eru heyrnarlausir, heyrnarskertir, daufblindir og afkomendur þeirra. Umræðan var túlkuð á táknmál og heyrnarlausir fjölmenntu á þingpalla í sérmerktum bolum. Félag þeirra hefur barist áratugum saman fyrir þessari viðurkenningu.


Svandís Svavarsdóttir sagði sögu heyrnarlausra vera sögu táknmálsins og lengi vel hafi málið verið bannað við kennslu heyrnarlausra. „Dagurinn í dag er því stór dagur fyrir réttindarbaráttu heyrnarlausra, hér er lagður mikilvægur grunnur að raunverulegum réttarbótum fyrir heyrnarlausa á Íslandi. Til hamingju með daginn,“ sagði Svandís.