Freista þess að vísa málinu til Hæstaréttar

Arnarlax, Laxeldi Sjókvíar, Fiskeldi, Arnarborg, Iðnaður, Tálknafjörður. Dróni.
 Mynd: Jóhannes Jónsson - RUV.is
Veiðiréttarhafar í Haffjarðará á Snæfellsnesi, sem tapað hafa ógildingarmáli gegn Arnarlaxi, Matvælastofnun og Umhverfisstofnun, ætla að freista þess að skjóta málinu til Hæstaréttar. Landsréttur vísaði málinu frá á föstudag.

Héraðsdómur Reykjavíkur hafði komist að sömu niðurstöðu um að vísa frá kröfu um að fiskeldisleyfi í Arnarfirði á Vestfjörðum verði ógilt.

Veiðiréttarhafar í Haffjarðará á Snæfellsnesi, fyrirtækin Akurholt ehf. og Geiteyri ehf., vilja að dómstólar afturkalli rekstrarleyfi Matvælastofnunar og starfsleyfi Umhverfisstofnunar fyrir sjókvíaeldi Arnarlax í Arnarfirði. Veiðiréttarhafarnir halda því fram að laxeldið skapi hættu fyrir villta laxastofna í landinu og lögvarða hagsmuni sína.

Landsréttur, eins og Héraðsdómur Reykjavíkur, féllst ekki á þetta og þess vegna hefur Arnarlax enn leyfi til að stunda sjókvíaeldi í Arnarfirði. Jón Steinar Gunnlaugsson, lögmaður veiðiréttarhafa, segir að þeir ætli að freista þess að skjóta málinu til Hæstaréttar. Kærufrestur rennur út í lok næstu viku.

Landsréttur staðfesti úrskurð héraðsdóms en hækkaði upphæðina sem stefnendur eiga að greiða í málskostnað. Varnaraðilarnir í málinu eru þrír: Umhverfisstofnun, Matvælastofnun og Arnarlax ehf. Héraðsdómur vildi að stefnendur greiddu hverjum stefndu eina milljón króna en Landréttur hækkaði upphæðina um 200.000 krónur til hvers varnaraðila.

Uppfært kl. 16:13 - Landsréttur hækkaði upphæðina sem stefnendur þurfa að greiða, en lækkaði hana ekki. Það hefur verið leiðrétt í textanum.

birgirthh's picture
Birgir Þór Harðarson
Fréttastofa RÚV
Síðast:
Þessi þáttur er í hlaðvarpi