Athugið þessi frétt er meira en mánaðargömul.

Framsókn vill afnema verðtryggingu

14.10.2018 - 08:35
Mynd með færslu
 Mynd: framsokn.is
Landsstjórn og þingflokkur Framsóknarflokksins héldu fund á Hellu um helgina þar sem farið var yfir áherslumál þingflokks og landsstjórnar. Flokkurinn ætlar að leggja áherslu á húsnæðismál, kjaramál, málefni barna og fjölskyldna og menntamál. Í fréttatilkynningu segir að fundurinn sé liður í flokksstarfinu og hluti undirbúnings fyrir fyrirhugaðan miðstjórnarfund í nóvember.

Flokkurinn er að móta stefnu í málefnum aldraðra og í fréttatilkynningu segir að vinna skuli áfram að bættum kjörum öryrkja og leggja áherslu á forvarnir í öllum aldurshópum. Fundurinn lagði áherslu á að innleiða svissnesku leiðina og að afnema verðtryggingu.

„Byggðamál eru í brennidepli og mikilvægi íslensks landbúnaðar, matvælaöryggi er þjóðinni dýrmætt og ljóst að dómur hæstaréttar kallar á viðbrögð við innflutningi á hráu kjöti. Íslensk stjórnvöld þurfa að taka upp viðræður við Evrópusambandið um matvælalöggjöf,“ segir í fréttatilkynningunni.

Fundurinn lagði áherslu á mikilvægi samgangna, þær séu grunnur að velferð þjóðarinnar og framþróunar atvinnulífs. „Nú hefur verið lögð fram fjármögnuð samgönguáætlun, með stefnumótun til framtíðar, sem nauðsynlegt er að fylgja eftir svo árangur náist.“ Þá telur fundurinn að eigendastefna opinberra fyrirtækja þurfi að vera gagnsæ og þjóna þörfum landsmanna betur.

dagnyhe's picture
Dagný Hulda Erlendsdóttir