Mynd:
Fönnin í Húsavíkurfjalli óvenju langlíf
Í áratugi hefur hópur Húsvíkinga spáð fyrir um það hvenær Dagmálalág í Húsavíkurfjalli verði snjólaus. Í láginni safnast jafnan mikill snjór og fönnin þar oft þaulsætin fram eftir sumri.
Eftir einstaklega hlýtt sumar á Húsavík mætti halda að fönnin væri löngu horfin, en svo er ekki. Hún hvarf ekki fyrr en 11. september og hefur ekki haldist svo lengi í Dagmálalág frá því formlegar mælingar hófust.
Það var á 3. hæð í gamla Kaupfélagshúsinu á Húsavík sem mælingar á fönninni í Dagmálalág hófust árið 1976. Síðan þá hefur það aldrei gerst að fönnin endist fram í september, eða í 39 ár. Fyrra met er frá árinu 1995, en þá hvarf fönnin 25. ágúst.
Egill Olgeirsson, einn af áhugamönnum fannarinnar umræddu, segir ljóst að mjög mikill og þéttur snjór hafi verið í Húsavíkurfjalli þegar fór að vora. Sumarið hafi verið með allra besta móti og marga daga hafi hitinn farið í 20 stig á Húsavík og vel það. Því sé það mjög sérstakt að fönnin í Dagmálalág skuli endast fram í september.
