Athugið þessi frétt er meira en 2 ára gömul.

Fjórum bjargað úr strönduðum báti við Súgandafjörð

14.11.2019 - 06:34
Mynd með færslu
 Mynd: Landhelgisgæslan - Facebook
Mannbjörg varð þegar 21 tonns fiskibátur strandaði við Gölt í utanverðum Súgandafirði í gærkvöld. Stjórnstöð Landhelgisgæslunnar barst neyðarkall frá bátnum klukkan 22 en fjórir voru um borð. Var þyrla Landhelgisgæslunnar kölluð út þegar í stað, sem og björgunarsveitir Slysavarnafélagsins Landsbjargar á norðanverðum Vestfjörðum.

Í tilkynningu frá Landhelgisgæslunni segir að báturinn hafi fljótlega skorðast milla kletta, þar sem nokkuð braut á honum. Hægur vindur var á svæðinu, en þónokkur alda. Björgunarskip komst ekki nálægt strandstað vegna brims og því voru björgunarsveitir sendar landleiðina frá norðanverðum Súgandafirði.

Þyrla Landhelgisgæslunnar, TF EIR, kom á vettvang klukkan 23:42, og áhöfn hennar hófst þegar handa við að bjarga skipverjunum fjórum um borð í þyrluna. Voru þeir allir komnir um borð í þyrluna, heilu og höldnu, á miðnætti, og voru fluttir til Ísafjarðar.

Búist var við að varðskipið Týr kæmi á strandsstað snemma morguns og verða aðstæður skoðaðar með tilliti til þess hvort hægt verði að ná bátnum af strandstað.

Ævar Örn Jósepsson
Fréttastofa RÚV