Fjórir þingmenn Miðflokksins biðjast afsökunar

29.11.2018 - 13:22
Mynd með færslu
 Mynd: Þór Ægisson - RÚV
„Við fjórir þingmenn Miðflokksins sem sátum á hótelbarnum Klaustri í liðinni viku viljum biðja þá sem farið var ónærgætnum orðum um í þeim einkasamtölum sem þar fóru fram einlæglegrar afsökunar,“ segir í yfirlýsingu sem Sigmundur Davíð Gunnlaugsson, Gunnar Bragi Sveinsson, Bergþór Ólason og Anna Kolbrún Árnadóttir sendu fjölmiðlum laust eftir klukkan eitt.

„Það var ekki ætlun okkar að meiða neinn og ljóst má vera að sá talsmáti sem þarna var á köflum viðhafður er óafsakanlegur. Við einsetjum okkur að læra af þessu og munum leitast við að sýna kurteisi og virðingu fyrir samferðarfólki okkar. Jafnframt biðjum við flokksmenn Miðflokksins og fjölskyldur okkar afsökunar á að hafa gengið fram með þessum hætti,“ segir í yfirlýsingunni. 

Á upptökum sem DV og Stundin hafa birt má heyra samtöl þeirra í milli á Klaustri bar þar sem farið er niðrandi orðum um ýmsa aðra þingmenn, þar á meðal Ingu Sæland, Oddnýju Harðardóttur, Silju Dögg Gunnarsdóttur og fleiri. 

Fréttirnar hafa vægast sagt valdið hneykslan og jafnvel sárindum hjá öðrum þingmönnum og hefur þess verið krafist að forsætisnefnd þingsins taki málið upp. 

 

Jón Hákon Halldórsson
Fréttastofa RÚV