Fjölnir tekur við starfsemi Bjarnarins

Mynd með færslu
Frá vinstri: Helgi Þór Jóhannsson, formaður aðalstjórnar Skautafélagsins Bjarnarins; Jón Karl Ólafsson, formaður Fjölnis; Guðmundur L Gunnarsson, framkvæmdastjóri Fjölnis; Kristel Björk Þórisdóttir, formaður listskautadeildar. Mynd: Fjölnir

Fjölnir tekur við starfsemi Bjarnarins

28.09.2018 - 17:43
Starfsemi íshokkífélagsins Bjarnarins hefur verið lögð niður og mun Ungmennafélagið Fjölnir taka við starfsemi þess frá og með 1. október næstkomandi. Innan Fjölnis verður því stofnuð íshokkídeild og listskautadeild sem taka við starfsemi Bjarnarins. Þetta kemur fram í tilkynningu frá Fjölni í dag.

Yfirtaka Fjölnis á starfsemi Bjarnarins var samþykkt á framhaldsaðalfundi Bjarnarins í gær með 80% atkvæða. Samkvæmt samkomulagi færast allir iðkendur og starfsmenn Bjarnarins yfir til Fjölnis auk þess sem núverandi stjórnir í hokkídeild og listskautadeild hjá Birninum verða skipaðar í stjórnir sömu deilda hjá Fjölni.

Markmið samkomulagsins er að bæta þjónustu og styrkja stoðir deildanna.

Hér fyrir neðan má sjá fréttatilkynningu Fjölnis í heild.

Á framhaldsaðalfundi Skautafélagsins Bjarnarins í gær var samþykkt tillaga um að öll starfsemi félagsins skyldi yfirtekin af Ungmennafélaginu Fjölni og starfrækt þar frá 1. október 2018. Fundurinn var vel sóttur og var tillagan samþykkt með rúmlega 80% atkvæða. Öll starfsemi Bjarnarins verður lögð inní Fjölni og þar verði stofnaðar tvær deildir, hokkídeild og listskautadeild sem taka við núverandi starfi Bjarnarins og starfrækja það áfram undir merkjum Fjölnis.  Við gildistöku þessa samkomulags munu allir starfsmenn og  iðkendur Bjarnarins   færast yfir til Fjölnis.

Fjölnir mun yfirtaka allar íþróttalegar skyldur Bjarnarins, eignir, skuldir og skuldbindingar við þjálfara, iðkendur og samstarfsaðila sbr. 1. mgr.

Eftir að samkomulagið öðlast gildi verður engin starfsemi í Skautafélaginu Björninn.

Núverandi stjórnir í hokkýdeild og listskautadeild verða skipaðar stjórnir í sömu deildum hjá Fjölni fram að þeim tíma að haldnir verða aðalfundir í umræddum deildum þar sem kosning stjórna fer fram. 

Íþróttabandalag Reykjavíkur styður þetta samkomulag og mun færa styrki vegna starfsemi deildanna yfir til Fjölnis frá og með 1 október 2018.

Í samræmi við framanritað mun Fjölnir taka formlega við umræddri  starfsemi Bjarnarins frá og með  1. október 2018. Frá og með sama tíma mun Fjölnir  taka þá yfir samninga við IBR og Reginn.

Við viljum bjóða nýja iðkendur, forráðamenn þeirra, þjálfara og starfsmenn velkomna í Fjölni og hlökkum til að vinna með þeim áfram það góða starf sem unnið var í Birninum.

Markmið okkar með þessu samkomulagi er að reka sterkari stoðir undir starfsemina almennt, bæta þjónustu og mæta auknum kröfum sem gerðar eru til íþróttafélagsins.  Við þetta samkomulag verður Fjölnir með 12 deilda félag og um 4.000 iðkendur á öllum aldri.  Með þessu styrkist staða félagins ennfrekar í Egilshöll þar sem HJARTAÐ SLÆR.  Þar verður félagið með starfsemi á samastað í knattspyrnu, handbolta, körfubolta, karate, fimleikum, frjálsar, hokkí, listskautar, íþróttir eldri borgara, íþróttaakademíu í samstarfi við Borgarholtsskóla ásamt skrifstofu og félagsaðstöðu.  Skákdeildin okkar er í Rimaskóla, sunddeildin er í sundlaug Grafarvogs og laugardalslaug og svo erum við með tennisdeild í Tennishöllinni í Kópavogi en við erum að vinna í því að koma henni aftur í gang í Egilshöll á næstu mánuðum ásamt frekari uppbyggingu þar í framtíðinni enda félagið í stóru vaxandi hverfi og á marga iðkendur í austurborginni.