Athugið þessi frétt er meira en 1 ára gömul.

Fjölmennustu móttökur flóttafólks hingað til

Mynd með færslu
 Mynd: RÚV
Ríkisstjórnin samþykki á fundi sínum í seinustu viku tillögu flóttamannanefndar þess efnis að tekið yrði á móti 85 flóttamönnum í samstarfi við Flóttamannastofnun Sameinuðu þjóðanna.

Þetta er fjölmennasta móttaka flóttafólks frá því að íslensk stjórnvöld hófu að taka á móti fólki á flótta í samstarfi við Flóttamannastofnunina. Er það í samræmi við stjórnarsáttmála ríkisstjórnarinnar sem kveður á um að Ísland taki á móti fleira fólki.

Þetta kemur fram í tilkynningu frá stjórnarráðinu. Gert er ráð fyrir að tekið verði á móti fólki frá þremur svæðum:

Tekið verði á móti sýrlensku flóttafólki sem er í Líbanon en Sýrlendingar eru enn fjölmennasta þjóðin sem hefur þörf fyrir vernd. Staða Sýrlendinga í Líbanon fer síversnandi. Má þar nefna að um 55% barna hafa ekki aðgang að formlegri menntun. Þar af hafa 40% engan aðgang að menntun og innan við 5% barna á aldrinum 15–18 ára hafa möguleika á menntun.

Þá verður einnig tekið á móti flóttafólki sem er í Keníu. Flóttamannastofnun áætlar að 45 þúsund manns séu í brýnni þörf fyrir að komast sem kvótaflóttafólk frá Kenía á þessu ári. Stofnunin hefur skilgreint fjóra hópa sem eru sérlega viðkvæmir. Það er hinsegin flóttafólk, flóttafólk frá Suður-Súdan, flóttafólk sem hefur tekið þátt í stjórnmálum, mannréttindabaráttu og blaðamennsku og fólk með sértækar þarfir á flótta frá Sómalíu.

Þá verði einnig tekið á móti afgönsku flóttafólki sem er í Íran. Áætlað er að Afganir á flótta séu 2,6 milljónir en átök í Afganistan hafa staðið yfir í langan tíma og því hafa margir dvalið langtímum saman í flóttamannabúðum. Afganskar konur og stúlkur eru í sérlega viðkvæmri stöðu vegna kynbundins ofbeldis, þvingaðra hjónabanda og annarra hefða sem tengjast uppruna þeirra, kyni og stöðu.

Tuttugu milljónir á flótta

Frá árinu 2015 hafa 247 manns sest hér að sem flóttafólk og hafa fimmtán sveitarfélög tekið á móti hópum. Meiri hluti þess fólks kom frá Sýrlandi en einnig frá Írak, Úganda, Kongó, Simbabve, Rúanda, Súdan og Kamerún.

Flóttamannastofnun Sameinuðu þjóðanna (UNHCR) áætlar nú að 19,9 milljónir séu á flótta og að af þeim séu 1,44 milljónir í brýnni þörf fyrir að komast í öruggt skjól sem kvótaflóttafólk. Eingöngu 4% þeirra komust í öruggt skjól á síðasta ári.