Færeyingar halda upp á Ólafsvöku

29.07.2015 - 20:42
Mynd með færslu
 Mynd: Kringvarp
Þjóðhátíðardagur Færeyja er í dag, Ólafsvakan og mikið um dýrðir í Þórshöfn. Hátíðin hófst í gærkvöld, en hinn eiginlegi Ólafsvökudagur er í dag. Vakan er kennd við Ólaf helga Noregskonung, sem er verndardýrlingur Færeyja.

Lögþingsmenn, ríkisstjórn, prestar og æðstu embættismenn gengu í dag frá dómkirkjunni í Þórshöfn í Ólafsgöngunni að Lögþingshúsinu eins og hefð er fyrir. Á Ólafsvöku er mikið sungið og karlakór söng undir berum himni þegar fyrirmennin komu út úr dómkirkjunni.

Ólafur helgi verndardýrlingur Færeyja

Ólafur helgi Haraldsson Noregskonungur, sem stundum er nefndur Ólafur digri, í orrustunni við Stiklastaði nærri Þrándheimi 29. júlí 1030. Ólafur var tekinn í helgra manna tölu tveimur árum eftir dauða sinn. Ólafur helgi hefur alla tíð staðið nærri hjarta Færeyinga og halda þeir minningu hans á lofti og syngja um hann á Ólafsvökunni.

Mikið um dýrðir í Þórshöfn

Það er jafnan mikið um dýrðir í Þórshöfn á Ólafsvökunni, allir sem vettlingi geta valdið taka þátt, flestir skarta þjóðbúningum og sækja kappleiki, menningarviðburði og ekki síst kappróður en úrslit í Færeyjameistarakeppninni í kappróðri voru í gærkvöld. Þá snæða Færeyingar gjarnan hefðbundinn mat eins og skerpikjöt og grindhval á vökunni. Kaj-Leo Holm Johannesen, lögmaður, tilkynnti í hátíðarræðu sinni í dag að gengið yrði til Lögþingskosninga þann 1. september.

 

 

bogia's picture
Bogi Ágústsson
Fréttastofa RÚV
Síðast:
Þessi þáttur er í hlaðvarpi